ബിഗ് ബോസ് ഹൗസില്‍ നിന്ന് നടന്‍ മണിക്കുട്ടന്‍ പുറത്താകുമെന്നാണ് ഇപ്പോള്‍ പുറത്തുവരുന്ന റിപ്പോര്‍ട്ടുകള്‍. ബിഗ് ബോസിന്റെ പുതിയ പ്രൊമോയിലാണ് ഇതിന്റെ സൂചന ലഭിക്കുന്നത്. മണിക്കുട്ടന്‍ ചില പ്രത്യേക കാരണങ്ങളാല്‍ ബിഗ് ബോസ് വീടിനോട് യാത്ര പറയുകയാണെന്ന് ഈ പ്രൊമോ വീഡിയോയില്‍ പറയുന്നു. ഇതുകേട്ട് ബിഗ് ബോസ് വീട്ടിലെ മറ്റ് മത്സരാര്‍ഥികള്‍ ആകെ ഷോക്കിലായി. സ്വന്തം തീരുമാന പ്രകാരമാണ് മണിക്കുട്ടന്‍ പോകുന്നതെന്നും ഈ പ്രൊമോയില്‍ കേള്‍ക്കാം. മണിക്കുട്ടന്‍ ബിഗ് ബോസി വീടിനോട് വിട പറയാനുള്ള കാരണം തേടുകയാണ് ആരാധകര്‍.
ഷോയ്ക്കിടെ 'മണിക്കുട്ടന്റെ മാനസികനില അല്‍പ്പം ശരിയല്ലെന്ന് തോന്നുന്നു' എന്ന് മോഹന്‍ലാല്‍ ഒരു ദിവസം പറഞ്ഞിരുന്നു. ഇത് മണിക്കുട്ടനെ വലിയ രീതിയില്‍ വിഷമിപ്പിച്ചു. മോഹന്‍ലാലിന്റെ പരാമര്‍ശം ഏറെ വേദനിപ്പിച്ചെന്ന് മണിക്കുട്ടന്റെ പിന്നെയുള്ള പ്രതികരണത്തില്‍ നിന്നു വ്യക്തമാണ്. ബിഗ് ബോസ് ഹൗസില്‍ ഏറ്റവും കരുത്തനായ മത്സരാര്‍ഥിയായി മുന്നോട്ടുപോകുന്ന മണിക്കുട്ടന്‍ പൊട്ടിക്കരഞ്ഞു.
