ഐതിഹാസിക ബ്രാൻഡ് ജാവയ്ക്ക് പിന്നാലെ എൺപതുകൾ മുതൽ യുവാക്കളൂടെ ഹരമായി മാറിയ ക്ലാസിക് ബൈക്ക് ബ്രാൻഡ് യെസ്ഡിയെയും തിരികെ കൊണ്ടുവരാൻ ഒരുങ്ങി മഹീന്ദ്രയുടെ ഉടമസ്ഥതയിലുള്ള ക്ലാസിക് ലെജൻഡ്സ്. എൻഡി‌ടിവിയാണ് ഇത് സംബന്ധിച്ച് റിപ്പോർട്ടുകൾ പുറത്തുവിട്ടത്. എന്നാൽ പൂർണമായും ഇലക്ട്രിക് ബൈക്കായി ആയിരിയ്ക്കും യെസ്ഡിയുടെ രണ്ടാം വരവ് എന്നാണ് റിപ്പോർട്ടുകൾ.
പഴയ ക്ലാസിക് ലുക്കിൽ തന്നെയായിരിയ്ക്കും തിരിച്ചുവരവിലും വാഹനം എത്തുക. മഹീന്ദ്രയുടെ ഇലക്‌ട്രിക്ക് റേസിംഗ് (ഫോര്‍മുല ഇ) ടീമില്‍ നിന്നും, മഹിന്ദ്ര ഇലക്‌ട്രിക്ക് ബ്രാന്‍ഡില്‍ നിന്നുമുള്ള സാങ്കേതിക സഹകരണത്തോടെയാവും യെസ്ഡി ഇലക്ട്രിക് ബൈക്കുകളുടെ നിര്‍മ്മാണം. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണം കമ്പനികൾ നടത്തിയിട്ടില്ല. 2018 നവംബറിലാണ് ഐക്കൊണിക് ബ്രാൻഡ് ജാവയെ ക്ലാസിക് ലെജന്റ്സ് തിരികെ കൊണ്ടുവന്നത്. വലിയ സ്വീകാര്യത തന്നെ വാഹനത്തിന് ലഭിയ്ക്കുകയും ചെയ്തു.