ഒളിംപിക് ജേതാവിനെ അട്ടിമറിച്ചു; ഓസീസ് ഓപ്പണ്‍ സൂപ്പര്‍ സീരീസ് കിരീടം കെ ശ്രീകാന്തിന്

ഓസീസ് ഓപ്പണ്‍ സൂപ്പര്‍ സീരീസ് ബാഡ്മിന്റണ്‍ കിരീടം കിടംബി ശ്രീകാന്തിന്. ഫൈനലില്‍ നിലവിലെ ഒളിംപിക് ചാമ്പ്യന്‍ കൂടിയായ ചൈനയുടെ ചെന്‍ ലോങിനെ എതിരില്ലാത്ത ഗെയിമുകള്‍ക്ക് തറപറ്റിച്ചാണ് ശ്രീകാന്ത് കിരീടത്തില്‍ മുത്തമിട്ടത്. സ്‌കോര്‍ 22-20, 21-16. ശ്രീകാന്തിന്റെ നാലാം സൂപ്പര്‍ സീരീസ് കിരീടമാണിത്.  

മത്സരത്തില്‍ വ്യക്തമായ ആധിപത്യം പുലര്‍ത്തിയായിരുന്നു ശ്രീകാന്തിന്റെ കിരീട വിജയം. എതിരാളിയില്‍ നിന്ന് ശക്തമായ ചെറുത്ത് നില്‍പ് ഉണ്ടായെങ്കിലും അതിനെ മികവിലൂടെ മറികടന്ന് ശ്രീ കിരീടം കൈപ്പിടിയില്‍ ഒതുക്കി.തുടര്‍ച്ചയായ മൂന്നാം സൂപ്പര്‍ സീരീസ് ഫൈനല്‍ കളിച്ച ശ്രീയുടെ തുടര്‍ച്ചയായ രണ്ടാം കിരീടമാണിത്.