അത്‌ലറ്റിക്‌സിൽ ആദ്യമായി ഒരു മെഡൽ ഇന്ത്യയിലേക്കെത്തുമ്പോൾ അത് സ്വർണമായിരിക്കണമെന്ന് ഒരുപക്ഷേ ദൈവം എന്നേ കുറിച്ചുവെച്ചിരിക്കണം. മിൽഖാ സിങ്ങിലൂടെയും പി‌ടി ഉഷയിലൂടെയും അഞ്ജു ബോബി ജോർജിലൂടെയും ആദ്യ അത്‌ലറ്റിക്‌സ് മെഡൽ നേട്ടമെന്ന സ്വപ്‌നത്തിലേക്ക് ഇന്ത്യ ശ്രമം നടത്തിയെങ്കിലും അത് അവസാനമായി യാഥാർത്ഥ്യമാവുന്നത് നീരജിന്റെ സ്വർണനേട്ടത്തോടെയാണ്.
മത്സരത്തിൽ നീരജിന് ഏറ്റവും വലിയ വെല്ലുവിളിയാകുമെന്ന് കരുതപ്പെട്ട, ഈ വർഷം 96 മീറ്ററിലേറെ ദൂരം കുറിച്ച ജര്‍മ്മന്‍ താരം യൊഹാനസ്‌ വെറ്റര്‍ ആദ്യ റൗണ്ടുകളിൽ ഫൗൾ ആയതിനെ തുടർന്ന് പുറത്തായതാണ് നീരജിന് കാര്യങ്ങൾ എളുപ്പമാക്കിയത്. രണ്ടാം ശ്രമത്തിൽ 87 മീറ്റർ കുറിച്ച നീരജിന് വെല്ലുവിളി ഉയർത്തുന്ന ശ്രമങ്ങൾ ഒന്നും തന്നെ എതിരാളികളിൽ നിന്ന് ഉണ്ടായില്ല.
