പാപ്പു ഉറക്കമുണര്‍ന്നാലുടന്‍ ഒരു കട്ടന്‍ നിര്‍ബന്ധമാണ്, ഒപ്പം വര്‍ത്തമാന പത്രവും. അന്നും പതിവുപോലെ കൈയ്യില്‍ ആവിപറക്കുന്ന കാപ്പിയുമായി പത്രത്തിലൂടെ ഒരു “ചുടു സഞ്ചാരം” നടത്തുകയായിരുന്നു. പെട്ടെന്ന് കൈവിറച്ചു, കാപ്പി ഗ്ലാസ് നിലത്തു വീണു. പാപ്പുവിന് ആകെ ഒരു എരിപൊരി സഞ്ചാരം.
പാപ്പുവിന്‍റെ തലതെറിച്ച സന്താനം “എന്താ അപ്പാ” എന്ന ചോദ്യവുമായി അടുത്തു കൂടി. “ഇനി വീട്ടിലും കിട്ടും” എന്നു മാത്രമായിരുന്നു പാപ്പുവിന്‍റെ മറുപടി!
എന്ത് കിട്ടാനാ എന്നായിരിക്കും നിങ്ങള്‍ ചിന്തിക്കുന്നത്. അടി, നല്ല ചുട്ട അടിയുടെ കാര്യമാണ് പാപ്പു പറഞ്ഞത്. ഒന്നും മനസ്സിലായില്ല അല്ലേ? ജനകീയ പൊലീസിന്‍റെ ഭവന സന്ദര്‍ശനം എന്ന വാര്‍ത്തയാണ് പാപ്പുവിനെ ഈ വെകിളിയെല്ലാം പിടിപ്പിച്ചതും അടിയുടെ കാര്യം പറയിപ്പിച്ചതും!
ഇനി പാപ്പുവിനെ കുറിച്ച് ഒരു വിവരണമാവാം. പാപ്പു വീരബാഹുവാണ്...മുട്ടോളം നീണ്ടു കിടക്കുന്ന കൈകള്‍, ഒത്ത നീളത്തെ കുറ്റം വയ്ക്കാനിടകൊടുക്കാത്ത വീതിയും(വണ്ണം). പണ്ട് പുലിപ്പോലീസിനെ ഇടിച്ചു നിരപ്പാക്കിയതടക്കം അനേകം വീര കഥകളും ഈ വീരപാപ്പുവിന് സ്വന്തം. എന്നാല്‍, ഇതെല്ലാം കഥകളാണെന്ന് പാച്ചുവിനും ദൈവത്തിനും മാത്രമേ അറിയാവൂ!
പാപ്പുവെന്ന സാഹസികന് പൊലീസിനെ പേടിയായതെങ്ങനെ? നിസ്സാരം, അകലെയുള്ള സുഹൃത്ത് ക്ഷണിച്ചപ്പോള്‍ ഷാപ്പിലൊന്നു കയറി (കഷ്ടകാലത്തിന് അയാളൊരു ബ്ലോഗറായിരുന്നു...പാപ്പുവറിയാത്ത ലോകം പാപ്പുവിനെ അറിയാന്‍ പിന്നെന്തെങ്കിലും വേണോ?). ഒരു കുപ്പി മൂത്തവനെ വാങ്ങി അങ്ങ് പെരുക്കി. പിന്നെ അടുത്തതിന് പറഞ്ഞു. അപ്പോഴുണ്ട് തൊട്ടപ്പുറത്ത് ഇരുന്ന ആള്‍ പാപ്പുവിനെ അടിമുടി അളക്കുന്ന രീതിയില്‍ ഒന്നു നോക്കി. ഉടനൊരു ചോദ്യവും ആ സൂക്ഷ്‌മദൃക്‌ എയ്തുവിട്ടു, “എന്തെടാ നിന്‍റെ പേര്? ”
പാപ്പു സുഹൃത്തിനെയൊന്നു നോക്കി. അവന്‍ ആകെ ചൂളി, മുട്ടോളമെത്തുന്ന ജൂബ്ബ നനച്ചപ്പോള്‍ കുട്ടിയുടുപ്പിന്‍റെ പരുവത്തിലായി എന്ന് പറഞ്ഞപോലെ ഉള്ള ശരീരം ചുരുക്കി പാവത്തെ പോലിരിക്കുന്നു. രസികന്‍ കൂടിയായ പാപ്പു താന്‍ ഇപ്പോ അടികൊടുക്കുമെന്ന് കരുതിയാണ് ഈ ചൂളലും പിടയലുമൊക്കെ എന്നു വിശ്വസിച്ച് രംഗമങ്ങ് കൊഴുപ്പിച്ചേക്കാമെന്ന് തീരുമാനിച്ചു. മുന്നിലിരിക്കുന്നത് ഉള്ളില്‍ ചെല്ലട്ടെ, പിന്നെ പേരുപറയാമെന്ന് കവിതാരൂപേണ പാപ്പു മറുപടി നല്‍കി.
കവിത ചൊല്ലിത്തീര്‍ന്നില്ല, അതിനിപ്പുറം കിട്ടി ചെവിമൂടിയൊരെണ്ണം! പകുതി തീര്‍ത്ത കള്ളിന്‍റെ കുപ്പിയും ഷാപ്പിന്‍റെ മറയുടെ ഏതാനും പലകകളും പൊളിച്ച് ഒറ്റ വീഴ്ച. ഇപ്പോള്‍ പാപ്പു ഷാപ്പിലാന്നോ എന്ന് ചോദിച്ചാല്‍ അല്ല റോഡിലാന്നോ എന്ന് ചോദിച്ചാല്‍ അതുമല്ല എന്ന് പറയേണ്ട അവസ്ഥയിലാണ്. അടി വീഴും വരെ ചോദിച്ചത് പൊലീസാണെന്ന ധാരണ പാപ്പുവിനുണ്ടായില്ല. എന്നാല്‍, നഗരത്തില്‍ നിന്ന് വന്ന “കുശാഗ്ര” ബുദ്ധിക്ക് അതിയാന്‍റെ സോക്സിന്‍റെ നിറത്തില്‍ (കാക്കി)നിന്ന് “പുള്ളി” ആരെന്ന് മനസ്സിലാക്കാന്‍ കഴിഞ്ഞു.
ചാടി എണീറ്റ പാപ്പു...ഒന്നും മിണ്ടാതെ പറ്റ് തീര്‍ത്ത് വെളിയിലോട്ട് ഇറങ്ങി; കൂട്ടുകാരന്‍ അപ്പോഴും സ്തംഭനാവസ്ഥയില്‍ തന്നെ. വെളിയിലിറങ്ങിയ പാപ്പു ഒറ്റയോട്ടം, അതിനിടെ ഒരു വാക്യം കൂട്ടുകാരനു വേണ്ടി സമര്‍പ്പിക്കാനും മറന്നില്ല, “ വേണമെങ്കില്‍ ഓടിക്കോ”. പാപ്പു പിന്നീട് ഈ സംഭവത്തെ കുറിച്ച് സുഹൃത്തിനോട് ഇങ്ങനെ വിവരിച്ചു, “പ” കാരങ്ങളെ വിശ്വസിക്കരുത്, പ്രത്യേകിച്ച് പൊലീസിനെ!
എന്തായാലും പാപ്പു പറഞ്ഞത് നേരെങ്കില്‍ “ ഇനി വീട്ടിലും കിട്ടുമായിരിക്കും”!