ഇന്ത്യയുടെ സ്കോർപീൻ അന്തർവാഹിനികളുമായി ബന്ധപ്പെട്ട തന്ത്രപ്രധാന രേഖകളും വിവരങ്ങളും പ്രസിദ്ധീകരിക്കുന്നതിന് വിലക്ക്. ഫ്രാൻസിന്‍റെ പ്രതിരോധ സ്ഥാപനവും അന്തർവാഹിനി നിർമ്മിച്ച കമ്പനിയുമായ ഡി സി എൻ എസിന്റെ ഹര്‍ജിയിൽ ന്യൂ സൗത്ത് വെയിൽസ് കോടതിയാണ് താൽകാലിക വിലക്ക് ഏർപ്പെടുത്തിയത്.
വ്യാഴാഴ്ചയാണ് ഈ കേസ് സുപ്രീംകോടതി പരിഗണിക്കുന്നത്. അതുവരെയാണ് വിലക്കുള്ളത്. അന്തര്‍വാഹിനിയെ സംബന്ധിച്ച ഒരു വിവരങ്ങളും പുതിയതായി പ്രസിദ്ധീകരിക്കരുത്. കൂടാതെ നിലവിൽ പ്രസിദ്ധീകരിച്ച വിവരങ്ങളെല്ലാം പത്രത്തിന്‍റെ വെബ്സൈറ്റിൽ നിന്ന് നീക്കം ചെയ്യണമെന്നും ന്യൂ സൗത്ത് വെയിൽസ് കോടതി നിർദേശിച്ചു.