ബാങ്കുകളിൽ നിന്ന് പണം ലഭിക്കുന്നതുമായി ബന്ധപ്പെട്ടുണ്ടായ ബുദ്ധിമുട്ടുകൾ പരിഹരിക്കുന്നതിനായി പുതിയ നീക്കവുമായി കേന്ദ്ര സർക്കാർ. പണം പിൻവലിക്കുന്നതിനായി എ ടി എമ്മിനു പുറമെ പ്രെട്രോൾ പമ്പുകളെയും ആശ്രയിക്കാം. രാജ്യത്തെ 2500 പെട്രോൾ പമ്പുകളിൽ ഡെബിറ്റ് കാർഡോ ക്രെഡിറ്റ് കാർഡോ ഉപയോഗിച്ച് 2000 രൂപ വരെ പിൻവലിക്കാം. വൈകാതെ തന്നെ ഈ സംവിധാനം നിലവിൽ വരുമെന്നാണ് വിവരം.
പൊതുമേഖല എണ്ണകമ്പനി പ്രതിനിധികളും എസ് ബി ഐ ചെയർപേഴ്സൺ അരുന്ധതി ഭട്ടാചാര്യയും തമ്മിൽ നടത്തിയ ചർച്ചയിലാണ് തീരുമാനം. നവംബർ 24നു ശേഷം ഈ തീരുമാനം നടപ്പിലാക്കി തുടങ്ങും. ആദ്യ ഘട്ടത്തില്‍ 2500 പെട്രോള്‍ പമ്പുകളില്‍ തുടങ്ങിയ ശേഷം പിന്നീട് 20,000 പെട്രോള്‍ പമ്പുകളിലേക്ക് ഇത് വ്യാപിപ്പിക്കുവനാണ് നീക്കം. നോട്ട് പിന്‍വലിച്ചതിനെതുടര്‍ന്നുണ്ടായ പ്രതിസന്ധി മറികടക്കുവനാണ് പുതിയനീക്കം.
ഇതിനായി എസ് ബി ഐയുടെ സെയിൽസ് പോയിൻറ് ഉപകരണം എല്ലാ പെട്രോൾ പമ്പുകൾക്കും നൽകും. ഇതിൽ കാർഡ് സ്വയ്പ്പ് ചെയ്താണ് പണം നൽകുക. എണ്ണ കമ്പനികളുടെ നീക്കം ബാങ്കുകളിലെ നീണ്ട ക്യൂ ഒരു പരിധി വരെ കുറക്കുമെന്നാണ് കരുതുന്നത്. ഒരു ദിവസം 2000 രൂപ മാത്രമാണ് പെട്രോള്‍ പമ്പിലും കാര്‍ഡ് ഉപയോഗിച്ച് പിന്‍വലിക്കാന്‍ കഴിയുക.
പെട്രോൾ പമ്പുകളിൽ പഴയ നോട്ടുകൾ നവംബർ 24 വരെ സ്വീകരിക്കുന്നുണ്ട്. ഡെബിറ്റ് ക്രെഡിറ്റ് കാർഡ് ഇടപാടുകൾ കൂടുതൽ പ്രോൽസാഹിപ്പിക്കുന്നതിനായി പ്രചരണം നടത്തുമെന്നും പൊതുമേഖല എണ്ണകമ്പനികൾ അറിയിച്ചു. നവംബര് 24 വരെയാണ് പിന്‍വലിച്ച 500 ന്റെയും 1000ത്തിന്റെയും നോട്ടുകള്‍ പെട്രോള്‍ പമ്പുകളില്‍ സ്വീകരിക്കുന്നത്.