കുത്തബ് മിനാറിനേക്കാൾ ഉയരം, രണ്ട് ടവറുകളിലായി 915 ഫ്ലാറ്റുകൾ, എന്തിനാണ് നോയിഡയിലെ ഇരട്ടക്കെട്ടിടങ്ങൾ തകർക്കുന്നത്?
എമറാൾഡ് കോർട്ട് സൊസൈറ്റി പ്രദേശത്ത് മാനദണ്ഡങ്ങൾ ലംഘിച്ച് നിർമാണം നടത്തിയെന്ന് കോടതി കണ്ടെത്തിയതിനെ തുടർന്നാണ് കെട്ടിടം പൊളിക്കാൻ സുപ്രീംകോടതി ഉത്തരവിട്ടത്. ടവറിന് അനുമതി നൽകിയപ്പോൾ കെട്ടിട പ്ലാനിൽ 14 ടവറുകളും ഒമ്പത് നിലകളും കാണിച്ചു. പിന്നീട് പ്ലാൻ പരിഷ്കരിച്ചപ്പോൾ ഓരോ റ്റവറിലും 40 നിലകൾ നിർമ്മിക്കാൻ ബിൽഡർക്ക് അനുമതി നൽകുകയും ചെയ്തു. ടവറുകൾ നിർമ്മിച്ച സ്ഥലം യഥാർത്ഥ പദ്ധതി പ്രകാരം പൂന്തോട്ടമാക്കേണ്ടതായിരുന്നു.
ഇതിനെ തുടർന്നാണ് സൂപ്പർടെക് എമറാൾഡ് കോർട്ട് സൊസൈറ്റിയിലെ താമസക്കാർ 2012ൽ നിർമാണം അനധികൃതമാണെന്ന് ചൂണ്ടിക്കാട്ടി അലഹബാദ് ഹൈക്കോടതിയെ സമീപിച്ചത്. കൂടുതൽ ഫ്ലാറ്റുകൾ വിൽക്കുന്നതിനായി സൂപ്പർ ടെക് ഗ്രൂപ്പ് മാനദണ്ഡങ്ങൾ ലംഘിച്ചതായി ഹർജിക്കാർ വാദിച്ചു. ഇതനുസരിച്ച് 2014ൽ ഉത്തരവ് ഫയൽ ചെയ്ത തീയതി മുതൽ നാല് മാസത്തിനുള്ളിൽ (സ്വന്തം ചിലവിൽ) ടവറുകൾ പൊളിക്കണമെന്ന് കോടതി അതോറിറ്റിയോട് നിർദേശിച്ചു.
