പണം നല്‍കിയില്ല; സഹോദരങ്ങളെ പരസ്യമായി വെടിവച്ചു കൊന്നു - സംഭവം യുപിയില്‍
പണം നല്‍കാന്‍ വിസമ്മതിച്ച സഹോദരങ്ങളെ ഗുണ്ടാ സംഘം വെടിവച്ചു കൊന്നു. ബിസിനസുകാരായ ശ്യാം സുന്ദർ ജയ്സ്വാൾ (55), ശ്യാം മുരാത് ജയ്സ്വാൾ (48) എന്നിവരാണു കൊല്ലപ്പെട്ടത്. സംഭവത്തില്‍ പൊലീസ് അന്വേഷണം ആരംഭിച്ചു.
ഉത്തർപ്രദേശിലെ പ്രതാപ്ഗഢിയില്‍ വ്യാഴാഴ്ച രാത്രി എട്ടുമണിയോടെയായിരുന്നു നാടിനെ ഞടുക്കിയ സംഭവം. കെട്ടിട നിർമാണ സാമഗ്രികൾ നിർമിക്കുന്ന സുന്ദറിനോടും ശ്യാമിനോടും പണം നല്‍കണമെന്ന് ആവശ്യപ്പെട്ട് അഞ്ജാതകര്‍ ബന്ധപ്പെട്ടിരുന്നു.
പതിവായി ഫോണ്‍ കോളുകള്‍ വന്നതോടെ പണം നല്‍കാന്‍ സാധിക്കില്ലെന്ന് സഹോദരങ്ങള്‍ ഉറപ്പിച്ചു പറഞ്ഞു. സംഭവ ദിവസം ബൈക്കിലെത്തിയ അക്രമികള്‍ ഇരുവര്‍ക്കും നേര്‍ക്ക് വെടിയുതിര്‍ക്കുകയായിരുന്നു.
പണം ആവശ്യപ്പെട്ട് ഭീഷണി സന്ദേശങ്ങള്‍ ലഭിച്ചിരുന്നതായി കൊല്ലപ്പെടുന്നതിന് മുമ്പ് സഹോദരങ്ങള്‍ ബന്ധുക്കളെ അറിയിച്ചിരുന്നു.
