വധുവിന് വെള്ളപ്പാണ്ട് ഉണ്ടോയെന്ന സംശയം കാരണം കല്യാണവേദി കലാപക്കളമായി. വരന്‍റെ ബന്ധുക്കളില്‍ ഒരാള്‍ വധുവിന് വെള്ളപ്പാണ്ട് ഉണ്ടെന്ന് ആരോപിച്ചതോടെ വരന്‍ വിവാഹത്തില്‍ നിന്ന് പിന്‍‌മാറുകയായിരുന്നു. അതോടെ ബഹളമായി, ഒടുവില്‍ പൊലീസ് ഇടപെട്ടു.
ഉത്തര്‍‌പ്രദേശിലെ മഹോബ ജില്ലയിലാണ് സംഭവം. വിവാഹത്തില്‍ നിന്ന് പിന്‍‌മാറുക മാത്രമല്ല, വരന്‍റെ ബന്ധുക്കള്‍ വിവാഹവേദിയില്‍ ബഹളം വയ്ക്കുക കൂടി ചെയ്തതോടെ വധുവിന്‍റെ അച്ഛന്‍ പൊലീസിനെ വിളിക്കുകയായിരുന്നു.
പൊലീസ് എത്തിയതോടെ ഒത്തുതീര്‍പ്പ് ശ്രമങ്ങള്‍ ആരംഭിച്ചു. പഞ്ചായത്ത് അംഗങ്ങളും സംഭവത്തില്‍ ഇടപെട്ടു. ഒടുവില്‍ പെണ്‍കുട്ടിക്ക് പാണ്ട് ഇല്ലെന്ന് ഉറപ്പിച്ചാല്‍ മാത്രം വിവാഹം നടത്താമെന്ന് വരന്‍റെ ബന്ധുക്കള്‍ വ്യക്തമാക്കി.
പൊലീസ് സ്റ്റേഷന്‍റെ ഒരു മുറിയില്‍ വധുവിനെ വരന്‍റെ ബന്ധുക്കളായ സ്ത്രീകള്‍ക്ക് പരിശോധിക്കാനുള്ള സൌകര്യമൊരുക്കി. വധുവിനെ പരിശോധിച്ചപ്പോള്‍ ആരോപണം തെറ്റാണെന്ന് മനസിലായി.
ഒടുവില്‍ വിവാഹത്തിന് വരനും ബന്ധുക്കളും തയ്യാറായി. വധുവിന്‍റെ പിതാവ് പൊലീസ് കേസ് പിന്‍‌വലിക്കാനും തയ്യാറായി. വരന്‍റെ മാതാപിതാക്കളില്‍ നിന്ന് പൊലീസ് മാപ്പും എഴുതിവാങ്ങിയതോടെയാണ് വിവാഹത്തിന് വീണ്ടും കളമൊരുങ്ങിയത്.
