തമിഴ്നാട് മുഖ്യമന്ത്രി ജയലളിത കഴിഞ്ഞ 47 ദിവസങ്ങളായി ചെന്നൈ അപ്പോളോ ആശുപത്രിയില്‍ ചികിത്സയില്‍ കഴിയുകയാണ്. ചികിത്സയുടെ വിശദാംശങ്ങളൊന്നും പുറത്തുവിട്ടിട്ടില്ലെങ്കിലും ജയലളിത ഉടന്‍ ആശുപത്രി വിടുമെന്നാണ് സൂചന. എന്നത്തേക്ക് ആശുപത്രി വിടണമെന്ന കാര്യത്തില്‍ ജയലളിതയ്ക്ക് തന്നെ തീരുമാനമെടുക്കാമെന്നാണ് ആശുപത്രി അധികൃതര്‍ വെളിപ്പെടുത്തിയിരിക്കുന്നത്.
എന്നാല്‍ ആശുപത്രി വിട്ടാലും ജയലളിതയ്ക്ക് കുറച്ചുകാലം കൂടി ചികിത്സ ആവശ്യമായി വരുമെന്നും പഴയ നിലയിലേക്ക് മടങ്ങിയെത്താന്‍ ഇനിയും സമയമെടുക്കുമെന്നുമാണ് ചില റിപ്പോര്‍ട്ടുകള്‍. ജയലളിതയ്ക്ക് ലണ്ടനില്‍ നിന്നെത്തി വിദഗ്ധ ചികിത്സ നല്‍കിയ ഡോ. റിച്ചാര്‍ഡ് ജോണ്‍ ബീലിനോട് കൂടുതല്‍ ചികിത്സ ആവശ്യമുണ്ടാകുമെന്ന കാര്യം ജയലളിതയോട് അടുപ്പമുള്ളവര്‍ സൂചിപ്പിച്ചെന്നാണ് വിവരം.
