ജയറാം ചിത്രം കാണാ കണ്‍‌മണി ഈ വാരം ഹിറ്റ് ചാര്‍ട്ടില്‍ ഒന്നാം സ്ഥാനത്തെത്തി. ആദ്യ ദിനങ്ങളില്‍ ഉണ്ടായിരുന്ന അഭിപ്രായ വ്യത്യാസങ്ങളെ മറികടന്ന് ചിത്രം മികച്ച വിജയം നേടുമെന്നാണ് പ്രതീക്ഷിക്കപ്പെടുന്നത്. കുടുംബപ്രേക്ഷകരുടെ തള്ളിക്കയറ്റമാണ് കാണാ കണ്‍‌മണിക്ക് തുണയായത്. അക്കു അക്ബര്‍ സംവിധാനം ചെയ്ത ഈ ചിത്രം ഹൊറര്‍ മൂഡിലുള്ള ഒരു കുടുംബകഥയാണ്.
ഷൈജു അന്തിക്കാട് സംവിധാനം ചെയ്ത ഒരു ബ്ലാക്ക് ആന്‍റ്‌ വൈറ്റ് കുടുംബം എന്ന സിനിമയുടെ മുന്നേറ്റമാണ് എടുത്തുപറയേണ്ട ഒരു കാര്യം. ചിത്രം ഹിറ്റാകുമെന്നാണ് ഇപ്പോഴത്തെ തിയേറ്റര്‍ റിപ്പോര്‍ട്ടുകള്‍ സൂചിപ്പിക്കുന്നത്. നര്‍മ്മത്തില്‍ പൊതിഞ്ഞു പറയുന്ന ഈ കൊച്ചു കഥ പ്രേക്ഷകരെ രസിപ്പിക്കുന്നുണ്ട്. ‘ഇവര്‍ വിവാഹിതരായാല്‍’ എന്ന സൂപ്പര്‍ ഹിറ്റിന് ശേഷം ബ്ലാക്ക് ആന്‍റ്‌ വൈറ്റ് കുടുംബവും ശ്രദ്ധേയമാകുന്നത് ജയസൂര്യയുടെ താരമൂല്യം ഉയര്‍ത്തിയിരിക്കുകയാണ്. ബ്ലാക്ക് ആന്‍റ്‌ വൈറ്റ് കുടുംബം ഹിറ്റ് ചാര്‍ട്ടില്‍ മൂന്നാം സ്ഥാനത്താണ്.
പൃഥ്വിരാജിന്‍റെ പുതിയ മുഖം ജൈത്രയാത്ര തുടരുകയാണ്. ചിത്രത്തിന്‍റെ പേരു സൂചിപ്പിക്കുന്നതു പോലെ പൃഥ്വി എന്ന നടന്‍റെ മാറിയ മുഖമാണ് ഈ സിനിമയിലൂടെ കാണാനാകുന്നത്. ഒരു തമിഴ് സിനിമയാണോ എന്ന് സംശയിക്കത്തക്ക രീതിയില്‍ ഗംഭീരമായ ആക്ഷന്‍ രംഗങ്ങളാണ് ദീപന്‍ സംവിധാനം ചെയ്ത പുതിയ മുഖത്തിന്‍റെ ഹൈലൈറ്റ്. ഈ സിനിമയുടെ തകര്‍പ്പന്‍ വിജയം പൃഥ്വിരാജിനെ സൂപ്പര്‍താരങ്ങളുടെ നിരയില്‍ പ്രതിഷ്ഠിച്ചിരിക്കുകയാണ്. പുതിയമുഖമാണ് രണ്ടാം സ്ഥാനത്ത്.
മമ്മൂട്ടിയുടെ ഡാഡി കൂളിന് ഇപ്പോഴും കുടുംബപ്രേക്ഷകരുടെ തിരക്കുണ്ട്. എങ്കിലും യുവാക്കളെ ആകര്‍ഷിക്കാന്‍ കഴിയാതെ പോയതും സംഭാഷണങ്ങളിലെ കൃത്രിമത്വവും ചിത്രത്തിന് വിനയായി. ഹിറ്റ് ചാര്‍ട്ടില്‍ നാലാം സ്ഥാനത്താണ് ഈ സിനിമ.
PRO
ജോണി ആന്‍റണി സംവിധാനം ചെയ്ത ‘പട്ടണത്തില്‍ ഭൂതം’ കുട്ടികളെയും കുടുംബങ്ങളെയും ഒരുപോലെ ആകര്‍ഷിച്ച് മുന്നേറുകയാണ്. ഈ വര്‍ഷത്തെ മികച്ച ഹിറ്റുകളിലൊന്നായി ഈ സിനിമ എണ്ണപ്പെട്ടു കഴിഞ്ഞിട്ടുണ്ട്. ഹിറ്റ് ചാര്‍ട്ടില്‍ അഞ്ചാം സ്ഥാനത്തായ ഈ സിനിമയുടെ ഫസ്റ്റ് ഷോകള്‍ മിക്ക കേന്ദ്രങ്ങളിലും ഇപ്പോഴും ഹൌസ് ഫുള്ളാണ്.
മോഹന്ലാലിന്റെ അഭിനയ വിസ്മയം കൊണ്ട് സമ്പന്നമായ ഭ്രമരം ഹിറ്റ് ചാര്‍ട്ടില്‍ നിന്ന് പുറത്തായി. ശ്യാമപ്രസാദിന്‍റെ ഋതുവിനും നേട്ടമുണ്ടാക്കാനായില്ല. വന്‍ ചിത്രങ്ങളുടെ വരവിനായി ഒരുങ്ങുകയാണ് ഇപ്പോള്‍ തിയേറ്ററുകള്‍.
