മഞ്ജു വാര്യർ വാക്ക് നൽകി പറ്റിച്ചു; വീടിന് മുന്നിൽ കുടില് കെട്ടി സമരത്തിനൊരുങ്ങി ആദിവാസികൾ
തിങ്കള്‍, 11 ഫെബ്രുവരി 2019 (12:38 IST)
നടി മഞ്ജു വാര്യര്‍ വാക്ക് നൽകി പറ്റിച്ചെന്നാരോപിച്ച് നടിയുടെ വീടിനു മുന്നിൽ കുടിൽ കെട്ടി സമരം തുടങ്ങാനൊരുങ്ങി ആദിവാസികൾ. വീട് നിർമിച്ച് നൽകാമെന്ന് പറഞ്ഞ് താരം പറ്റിച്ചെന്ന് വയനാട് പരക്കുനി കോളനിയിലെ ആദിവാസികൾ പറയുന്നു.
ഒന്നര വര്‍ഷം മുൻപാണ് വീട് വാഗ്ദാനവുമായി മഞ്ജു വാര്യര്‍ ആദിവാസി കോളനിയിലെത്തിയത്. ജില്ലാ ഭരണകൂടവുമായി ചര്‍ച്ച ചെയ്ത് പദ്ധതിയും തയ്യാറാക്കി, പക്ഷെ നാളിതുവരെയായിട്ടും പ്രാരംഭ പ്രവര്‍ത്തനം പോലും നടത്തില്ലെന്നാണ് ആദിവാസികളുടെ ആക്ഷേപം.
57 കുടംബങ്ങളാണ് കോളനിയിലുള്ളത്. മഞ്ജുവാര്യരുടെ വാദ്ഗാനം വന്നതോടെ മറ്റ് പദ്ധതികളൊന്നും ഇവര്‍ക്ക് ലഭിക്കാതായി. വീട് പുതുക്കി പണിയുന്നതിനോ പുനര്‍ നിര്‍മ്മാണത്തിനോ സഹായം കിട്ടുന്നില്ല. ഈ സാഹചര്യത്തിലാണ് ആദിവാസികൾ പരസ്യമായി പ്രതിഷേധിക്കാൻ ഒരുങ്ങുന്നത്.
ഈ വരുന്ന 13 ന് തൃശൂരിലെ താരത്തിന്റെ വീടിന് മുന്നിൽ കുടിൽ കെട്ടി സമരം തുടങ്ങുമെന്ന് ആദിവാസികൾ വയനാട്ടിൽ വിളിച്ച വാര്‍ത്താസമ്മേളനത്തിൽ അറിയിച്ചു.
