യുവതി പ്രവേശം ഉണ്ടായാല്‍ അന്നുതന്നെ ശബരിമല അനിശ്ചിതകാലത്തേക്ക് അടച്ചിടാന്‍ ആലോചനകള്‍ നടക്കുന്നതായി വിവിധ മാധ്യമങ്ങള്‍ റിപ്പോര്‍ട്ട് ചെയ്തു. സന്നിധാനം അശുദ്ധമായെന്ന കാരണത്താല്‍ പുണ്യാഹം തളിക്കുന്നതിനായാണ് നട അടയ്ക്കുക. എന്നാല്‍ യുവതി പ്രവേശം സ്ഥിരമായി ഉണ്ടാകുന്ന സാഹചര്യം നിലനില്‍ക്കുന്നതിനാല്‍ ദിവസവും പുണ്യാഹം തളിക്കുന്നത് അസാധ്യമാകുമെന്നും അതിനാല്‍ ഒരു തീരുമാനമുണ്ടാകുന്നതുവരെ ക്ഷേത്രം തുറക്കേണ്ടതില്ലെന്ന നിലപാട് സ്വീകരിച്ചേക്കുമെന്നുമാണ് റിപ്പോര്‍ട്ടുകള്‍.
ആചാരങ്ങളുടെ കാര്യത്തില്‍ പൂര്‍ണമായ അധികാരം തന്ത്രികുടുംബത്തിനാണ്. അതുകൊണ്ടുതന്നെ ഇക്കാര്യത്തില്‍ ഒരു തീരുമാനമെടുക്കാന്‍ തന്ത്രി കുടുംബത്തിനും പന്തളം കൊട്ടാരത്തിനും കഴിയും. തന്ത്രി കുടുംബത്തെയും പന്തളം കൊട്ടാരത്തെയും അവഗണിച്ചുകൊണ്ട് ശബരിമലയില്‍ ഒരു തീരുമാനവും കൈക്കൊള്ളാന്‍ സര്‍ക്കാരിന് കഴിയില്ലെന്നാണ് അവര്‍ കരുതുന്നത്.
