പിണറായിക്കും ചെന്നിത്തലയ്ക്കും ആഡംബരവാഹനങ്ങള്‍; ചെലവ് 10 കോടി!
ബുധന്‍, 29 മാര്‍ച്ച് 2017 (15:19 IST)
സംസ്ഥാനം കടുത്ത സാമ്പത്തിക പ്രതിസന്ധി നേരിടുന്ന സാഹചര്യം നിലനില്‍ക്കെ സര്‍ക്കാര്‍ ആഡംബരവാഹങ്ങള്‍ വാങ്ങുന്നു. മുഖ്യമന്ത്രിക്കും പ്രതിപക്ഷ നേതാവിനുമടക്കമുള്ളവര്‍ക്കായി 35 ഇന്നോവ ക്രിസ്‌റ്റ കാറുകള്‍ വാങ്ങാനാണ് സര്‍ക്കാര്‍ തീരുമാനിച്ചിരിക്കുന്നത്.
പുതിയ വാഹനം ആവശ്യപ്പെട്ട് പ്രതിപക്ഷനേതാവ് രമേശ് ചെന്നിത്തലയാണ് സര്‍ക്കാരിന് കത്ത് നല്‍കിയത്. നിലവില്‍ ഉപയോഗിക്കുന്ന കാര്‍ ഒന്നരലക്ഷം കിലോമീറ്റര്‍ ഓടിയെന്ന് ചൂണ്ടിക്കാട്ടിയാണ് അദ്ദേഹം സര്‍ക്കാരിനെ സമീപിച്ചത്.
മുഖ്യമന്ത്രി പിണറായി വിജയന്റേതടക്കമുള്ള കാറുകള്‍ ഒന്നരലക്ഷം കിലോമീറ്ററുകള്‍ പിന്നിട്ടു കഴിഞ്ഞു. കഴിഞ്ഞ സര്‍ക്കാരിന്റെ കാലത്ത് ഉപയോഗിച്ചിരുന്ന കാറുകളാണ് ഈ സര്‍ക്കാരും ഉപയോഗിക്കുന്നത്. ഭൂരിഭാഗം കാറുകളും കൂടുതല്‍ ദൂരം പിന്നിട്ടു കഴിഞ്ഞു.
മുന്തിയ തരത്തിലുള്ള 35 ഇന്നോവ ക്രിസ്‌റ്റ കാറുകള്‍ വാങ്ങുന്നത് സര്‍ക്കാരിന് കടുത്ത സാമ്പത്തിക പ്രതിസന്ധിയുണ്ടാക്കും. 10 കോടി രൂപ ഇതിനായി ചെലവാകും. പുതിയ വാഹനങ്ങള്‍ക്കായുള്ള ആവശ്യം പ്രതിപക്ഷം തന്നെ ആവശ്യപ്പെട്ട സാഹചര്യത്തില്‍ ഈ നീക്കത്തിനെതിരെ പ്രതിഷേധമുണ്ടാകില്ലെന്നാണ് സര്‍ക്കാര്‍ കരുതുന്നത്.
