സദ്യയില്‍ ചോറൊക്കെ കഴിച്ച ശേഷം വെടിപ്പാക്കിയ ഇലയില്‍ പപ്പടവും പുഴുങ്ങിയ പഴവും ഒന്നിച്ച് കുഴച്ച് അതിലേക്ക് പായസം ഒഴിക്കുന്ന പതിവുണ്ട് തൃശൂര്‍ മുതല്‍ തിരുവനന്തപുരം വരെയുള്ള സ്ഥലങ്ങളില്‍. കിടിലന്‍ കോംബിനേഷന്‍ എന്നാണ് ഇതിനെ അവിടെയുള്ളവര്‍ വിശേഷിപ്പിക്കുന്നത്. പുഴുങ്ങിയ പഴവും പപ്പടവും പായസവും ചേര്‍ത്ത് ഇലയില്‍ കഴിക്കുന്നത് പണ്ട് തൊട്ടേയുള്ള ശീലമെന്നാണ് തെക്കന്‍ ജില്ലക്കാരുടെ വാദം.
എന്നാല്‍ ഇങ്ങനെയൊരു കോംബിനേഷനെ കുറിച്ച് കേട്ടിട്ട് പോലും ഇല്ലെന്നാണ് തൃശൂരിന് അപ്പുറത്തേക്ക് വടക്കോട്ട് പോകുമ്പോള്‍ ഉള്ള ജില്ലക്കാരുടെ അഭിപ്രായം. പപ്പടവും പഴവും പായസത്തിനൊപ്പം ചേര്‍ത്തു കഴിക്കുന്നത് ആലോചിക്കാന്‍ പോലും വയ്യെന്നാണ് സോഷ്യല്‍ മീഡിയയില്‍ ഇക്കൂട്ടര്‍ വാദിക്കുന്നത്. ചോറിനൊപ്പം കൂട്ടി കഴിക്കേണ്ടതാണ് പപ്പടമെന്നാണ് ഇവരുടെ അഭിപ്രായം.
