പുഴയിൽ ചാടി രക്ഷപ്പെടാൻ ശ്രമിച്ച യുവാവ് മുങ്ങിമരിച്ചു

പറവൂർ: തന്നെ ആക്രമിക്കാൻ ആരോ പുറകിലൂടെ വരുന്നുണ്ടെന്നു സമീപ വാസികളോട് വിളിച്ചു പറഞ്ഞുകൊണ്ട് പുഴയിൽ ചാടി രക്ഷപ്പെടാൻ ശ്രമിച്ച യുവാവ് മുങ്ങിമരിച്ചു. ചേന്ദമംഗലം കിഴക്കുംപുറം പാണ്ടിശേരിൽ ഉണ്ണികൃഷ്ണൻ - മിനി ദമ്പതികളുടെ മകൻ മിഥുൻ കൃഷ്ണൻ എന്ന പപ്പൻ (28) ആണ് മുങ്ങിമരിച്ചത്.  

കഴിഞ്ഞ ദിവസം വൈകിട്ട് മൂന്നു മണിയോടെ വെടിമറ ശ്മാശാനത്തിനടുത്ത് പെരിയാറിന്റെ കൈവഴിയിലായിരുന്നു മിഥുൻ മുങ്ങിമരിച്ചത്. പുഴയുടെ മുക്കാൽ ഭാഗം വരെ മിഥുൻ നീന്തിയെങ്കിലും ശക്തമായ ഒഴുക്കിൽ മുങ്ങിപ്പോയിരുന്നു.

വിവരം അറിഞ്ഞെത്തിയ സ്‌കൂബാ ടീം മൂന്നു മണിക്കൂറോളം നടത്തിയ തിരച്ചിലിലാണ് മൃതദേഹം കണ്ടെടുത്തത്. സംഭവത്തിൽ ദുരൂഹത ഉണ്ടെന്ന ബന്ധുക്കളുടെ ആരോപണത്തെ തുടർന്ന് പോലീസ് ഇയാളുടെ സുഹൃത്തുക്കളെ കുറിച്ച് അന്വേഷിക്കുന്നുണ്ട്.