തെറ്റ് രമ്യ ഹരിദാസിന്റേത്, മുതിര്‍ന്ന നേതാക്കള്‍ നിര്‍ദേശിച്ച പലതും ചെയ്തില്ല, പഴി ചാരി പാലക്കാട് ഡിസിസി
ആലത്തൂര്‍ മണ്ഡലത്തിലെ യുഡിഎഫ് സ്ഥാനാര്‍ഥി രമ്യ ഹരിദാസിന്റെ പരാജയത്തില്‍ നേതൃത്ത്വത്തിന് പങ്കില്ലെന്നും സ്ഥാനാര്‍ഥിയുടെ ഭാഗത്ത് നിന്നുണ്ടായ പിഴവുകള്‍ വെല്ലുവിളിയായെന്നും പാലക്കാട് ഡിസിസി പ്രസിഡന്റ് എ തങ്കപ്പന്‍. മുതിര്‍ന്ന നേതാക്കളടക്കം നിര്‍ദേശിച്ച കാര്യങ്ങള്‍ക്ക് രമ്യ ചെവികൊടുത്തില്ല. എ വി ഗോപിനാഥ് ഫാക്ടര്‍ ആലത്തൂരില്‍ പ്രവര്‍ത്തിച്ചിട്ടില്ല. കുറഞ്ഞ വോട്ടുകളാണ് എല്‍ഡിഎഫിന് ലഭിച്ചതെന്നും എ തങ്കപ്പന്‍ പറഞ്ഞു.
അതിനിടെ ഈ വിവാദങ്ങളോട് രമ്യ ഹരിദാസ് പ്രതികരിച്ചു. വിവാദങ്ങള്‍ക്കില്ലെന്നും പറയാനുള്ളത് പാര്‍ട്ടി വേദികളില്‍ പറയുമെന്നും രമ്യ വ്യക്തമാക്കി. ഡിസിസി പ്രസിഡന്റിന്റെ പരാമര്‍ശം ഏത് സാഹചര്യത്തിലാണെന്ന് അറിയില്ല. എല്ലാ നേതാക്കളുമായും നല്ല രീതിയില്‍ സഹകരിച്ചാണ് പ്രവര്‍ത്തിച്ചത്. തോല്‍വിയുടെ കാര്യം പാര്‍ട്ടി പരിശോധിക്കട്ടെയെന്നും രമ്യാ ഹരിദാസ് പറഞ്ഞു.
