ബാര്‍ കോഴക്കേസിലെ ഗൂഢാലോചനയ്ക്ക് പിന്നില്‍ മുന്‍ ആഭ്യന്തരമന്ത്രി രമേശ് ചെന്നിത്തലയും അടൂര്‍ പ്രകാശും ബിജു രമേശുമാണെന്ന് യൂത്ത്ഫ്രണ്ട്. ഇക്കാര്യം വ്യക്തമാക്കി ഇവര്‍ സോണിയ ഗാന്ധിക്ക് കത്തയച്ചു. ബാര്‍ കോഴ ആരോപണവുമായി ബന്ധപ്പെട്ട കേസില്‍ കെ എം മാണിക്കെതിരെ മാത്രം കേസെടുത്തത് ഗൂഢാലോചനയുടെ ഭാഗമായാണെന്നും യൂത്ത്ഫ്രണ്ട് ആരോപിച്ചു.
മാണി ഇടതുമുന്നണിയിലേക്ക് പോകുമെന്ന ഭയമാണ് ഗൂഢാലോചനയ്ക്ക് പിന്നില്‍. പാലക്കാട് നടന്ന സി പി എം പ്ലീനത്തില്‍ മാണി പങ്കെടുത്തത് കോണ്‍ഗ്രസില്‍ സംശയമുണ്ടാക്കിയെന്നും ഇതിനെ തുടര്‍ന്ന് ബിജു രമേശിനെ കൂട്ടുപിടിച്ചാണ് ബാര്‍ കോഴക്കേസ് കൊണ്ടുവന്നതെന്നും യൂത്ത് ഫ്രണ്ട് ആരോപിച്ചു. ബാര്‍ കോഴക്കേസിന്റെ കാര്യത്തില്‍ ഉമ്മന്‍ ചാണ്ടിയും സംശയത്തിന്റെ നിഴലിലാണെന്ന് കത്തില്‍ പറയുന്നു.
ബിജു രമേശിന്റെ മകളുടെ കല്യാണത്തിന് മുന്‍ മന്ത്രിമാര്‍ പങ്കെടുത്തത് ഗൂഢാലോചന വ്യക്തമാക്കുന്നതാണ്. മന്ത്രിസഭയിലെ മറ്റു മന്ത്രിമാര്‍ക്കെതിരെയും ബിജു രമേശ് ആരോപണം ഉന്നയിച്ചെങ്കിലും മാണിക്കെതിരെ മാത്രമാണ് കേസെടുത്തതെന്നും കത്തില്‍ പറയുന്നുണ്ട്. വിഷയത്തില്‍ ശരിയായ നിലപാടെടുത്തത് കെ പി സി സി അധ്യക്ഷന്‍ വി എം സുധീരന്‍ ആണെന്നും കത്തില്‍ പറയുന്നു.