‘പിണറായിയുമായും ഇ പി ജയരാജനുമായും പി സി ജോര്‍ജ് ചര്‍ച്ച നടത്തി’ - ആരോപണത്തിലുറച്ച് പി ടി തോമസ്
ബുധന്‍, 24 ജൂലൈ 2013 (16:30 IST)
PRO
സി പി എമ്മുമായി നീക്കുപോക്കുണ്ടാക്കാന്‍ ചീഫ് വിപ്പ് പി സി ജോര്‍ജ് ശ്രമിച്ചു എന്ന ഗുരുതര ആരോപണത്തില്‍ ഉറച്ചുനില്‍ക്കുന്നതായി കോണ്‍ഗ്രസിന്‍റെ ഇടുക്കി എംപി പി ടി തോമസ്. സി പി എം സംസ്ഥാന സെക്രട്ടറി പിണറായി വിജയനുമായും കേന്ദ്രകമ്മിറ്റിയംഗം ഇ പി ജയരാജനുമായും അധികാര ദല്ലാള്‍ നന്ദകുമാറുമായും പി സി ജോര്‍ജ് ചര്‍ച്ച നടത്തിയെന്ന് പി ടി തോമസ് ആരോപിച്ചു.
പി സി ജോര്‍ജും പിണറായിയും ഇ പി ജയരാജനും ദല്ലാള്‍ നന്ദകുമാറും കൂടിക്കാഴ്ച നടത്തിയിട്ടുണ്ട്. അതിന്‍റെ വിശദാംശങ്ങള്‍ അടുത്ത ദിവസങ്ങളില്‍ പുറത്തുവരും. ദല്ലാള്‍ നന്ദകുമാറും പി സി ജോര്‍ജും ഒരു കാറില്‍ ഒരുമിച്ച് യാത്ര നടത്തി - പി ടി തോമസ് തന്‍റെ ആരോപണം ആവര്‍ത്തിച്ചു.
ചീഫ് വിപ്പ് സ്ഥാനത്തിരുന്നുകൊണ്ട് പി സി ജോര്‍ജ് നെറികേട് കാട്ടുകയാണ്. മുഖ്യമന്ത്രിക്കും മുന്നണിക്കും ജോര്‍ജ് അവമതിപ്പുണ്ടാക്കി. ജോര്‍ജിന്‍റെ പൂച്ച് ഇപ്പോള്‍ പുറത്തായിരിക്കുന്നു. ഉമ്മാക്കി കാട്ടി ഭയപ്പെടുത്താന്‍ ശ്രമിക്കുകയാണ് അദ്ദേഹം. സര്‍ക്കാരിനെ സംരക്ഷിക്കേണ്ട ചീഫ് വിപ്പ് പ്രതിപക്ഷവുമായി ചേര്‍ന്ന് ഗൂഢാലോചന നടത്തുകയാണ്. ജോര്‍ജ് രാജിവയ്ക്കില്ലെന്ന് വ്യക്തമായതായും പി ടി തോമസ് പറഞ്ഞു.
അടുത്ത പേജില്‍ - പിണറായിയെ കണ്ടിട്ട് പത്ത് വര്‍ഷമായി: പി സി ജോര്‍ജ്
PRO
സി പി എം സംസ്ഥാന സെക്രട്ടറി പിണറായി വിജയനെ അടുത്ത് കാണുകയോ സംസാരിക്കുകയോ ചെയ്തിട്ട് പത്തുവര്‍ഷമായെന്ന് ചീഫ് വിപ്പ് പി സി ജോര്‍ജ്. താനും പിണറായിയും ഇ പി ജയരാജനും ദല്ലാള്‍ നന്ദകുമാറും കൂടിക്കാഴ്ച നടത്തിയെന്ന പി ടി തോമസിന്‍റെ ആരോപണത്തോട് പ്രതികരിക്കുകയായിരുന്നു ജോര്‍ജ്.
മുഖ്യമന്ത്രിയോട് പറ്റിക്കൂടിനിന്ന് അദ്ദേഹത്തിന്‍റെ സംരക്ഷകന്‍ ചമയുകയാണ് പി ടി തോമസ്. മുഖ്യമന്ത്രിക്ക് അത് ദോഷം ചെയ്യും. ഇടുക്കിയിലെ കര്‍ഷകര്‍ക്കുവേണ്ടി വാദിക്കുന്ന എന്നോട് പി ടി തോമസിന് ശത്രുതയുണ്ട്. എന്നോടും ഉമ്മന്‍ചാണ്ടിയോടുമുള്ള ശത്രുത തീര്‍ക്കാനാണ് തോമസ് ഇപ്പോള്‍ ശ്രമിക്കുന്നത് - പി സി ജോര്‍ജ് പറഞ്ഞു.
ദല്ലാള്‍ നന്ദകുമാറിനെതിരെ താന്‍ നല്‍കിയ കേസിന് തുരങ്കം വയ്ക്കുന്നത് പി ടി തോമസും തിരുവഞ്ചൂര്‍ രാധാകൃഷ്ണനുമാണ്. സോളാര്‍ കേസുമായി ബന്ധപ്പെട്ട് ആരെങ്കിലും രാജിവയ്ക്കണമെങ്കില്‍ അത് തിരുവഞ്ചൂര്‍ രാധാകൃഷ്ണനാണെന്നും പി സി ജോര്‍ജ് വ്യക്തമാക്കി.
അടുത്ത പേജില്‍ - ലക്കും ലഗാനുമില്ലാത്തവര്‍ക്ക് മറുപടിയില്ല: ഇ പി ജയരാജന്‍
PRO
സി പി എം സംസ്ഥാന സെക്രട്ടറി പിണറായി വിജയനുമായും കേന്ദ്രകമ്മിറ്റിയംഗം ഇ പി ജയരാജനുമായും അധികാര ദല്ലാള്‍ നന്ദകുമാറുമായും പി സി ജോര്‍ജ് ചര്‍ച്ച നടത്തിയെന്ന പി ടി തോമസിന്‍റെ ആരോപണത്തിനെതിരെ ഇ പി ജയരാജന്‍ രംഗത്തെത്തി. ലക്കും ലഗാനുമില്ലാത്ത പി ടി തോമസിനെപ്പോലെയുള്ളവര്‍ പറയുന്ന അഭിപ്രായങ്ങളോട് മറുപടി പറയാന്‍ താനില്ലെന്ന് ജയരാജന്‍ പറഞ്ഞു.
എന്തെങ്കിലും നിലവാരമുള്ളവര്‍ ആരോപണമുന്നയിച്ചാല്‍ മറുപടി പറയാം. പി ടി തോമസിനെപ്പോലെ ലക്കും ലഗാനുമില്ലാത്തവര്‍ ഉന്നയിക്കുന്ന ആരോപണങ്ങള്‍ മറുപടി അര്‍ഹിക്കുന്നില്ല - ജയരാജന്‍ വ്യക്തമാക്കി.
