കഴിഞ്ഞ ബുധനാഴ്ചയാണ് തൃശൂരില്‍ നിന്ന് സ്വര്‍ണാഭരണങ്ങളുമായി പോയ വിയ്യൂര്‍ സ്വദേശി ജോബി റാഫേല്‍(41), മുളങ്കുന്നത്തുകാവ്‌ സ്വദേശി വിനോദ്കുമാര്‍(32) എന്നിവരുടെ കണ്ണില്‍ മുളകുപൊടി എറിഞ്ഞ്‌ മര്‍ദ്ദിച്ച്‌ അവശരാക്കി സ്വര്‍ണം കവര്‍ന്നത്‌.
ജോബി റാഫേല്‍ മധുരയിലെ ഒരു ലോഡ്ജിലാണ് താമസിച്ചിരുന്നത്. ലോഡ്ജിലേക്ക് പോകുന്ന വഴിയാണ് ഇയാള്‍ ആക്രമത്തിന് ഇരയായത്. കോയമ്പത്തൂര്‍, മധുര എന്നിവിടങ്ങളില്‍ നിന്ന് സ്വര്‍ണം വാങ്ങി തൃശൂരില്‍ കൊണ്ടുവന്ന്‌ പുതിയ മാതൃകയിലുള്ള ആഭരണങ്ങളാക്കി മധുരയിലെ ജ്വല്ലറികളില്‍ വില്‍ക്കുകയാണ്‌ ഇയാളുടെ പതിവ്
പ്രിസ്റ്റോ കൊണ്ടുവന്ന കാറില്‍ പ്രതികള്‍ തൃശൂരിലെത്തി. ബസില്‍ സ്വര്‍ണവുമായി രണ്ടു പേരും കയറിയെന്ന്‌ മനസിലാക്കിയ സംഘം തക്കുടുവിനെയും അതേ ബസില്‍ കയറ്റിവിട്ടു. പിന്നീട്‌ ബസിനെ പിന്‍തുടര്‍ന്ന്‌ കാറില്‍ മധുരയില്‍ എത്തുകയായിരുന്നു.
തമിഴ്‌നാട്‌ അതിര്‍ത്തിയില്‍ എത്തിയശേഷം പ്രതികള്‍ കാറിന്റെ രജിസ്ട്രേഷന്‍ നമ്പര്‍ തമിഴ്‌നാട്‌ രജിസ്ട്രേഷനാക്കി മാറ്റി. ബസ്‌ മധുരയില്‍ എത്തുന്നതിനുമുമ്പുതന്നെ ബസ്‌ സ്റ്റാന്‍ഡ്‌ പരിസരത്ത്‌ കാത്തു നിന്ന ഇവര്‍ ബസില്‍ നിന്നിറങ്ങിയ ജോബിയെയും വിനോദിനെയും ആക്രമിക്കുകയായിരുന്നു. തുടര്‍ന്ന്‌ സ്വര്‍ണമടങ്ങിയ ബാഗുമായി കാറില്‍തന്നെ പഴനിയില്‍ എത്തി.
പൊലീസ് പരിശോധന ഭയന്ന്‌ സജീവന്‍, ശരത്ത്‌, വിഷ്ണു എന്നിവര്‍ സ്വര്‍ണവുമായി ബസില്‍ കയറിയാണ്‌ നാട്ടിലെത്തിയത്‌. മധുരയില്‍തന്നെ ഇതിനുമുമ്പ്‌ മൂന്നുതവണ കവര്‍ച്ചയ്ക്ക്‌ ശ്രമിച്ചതായി പ്രതികള്‍ പൊലീസിനോട്‌ പറഞ്ഞു.
