ഇറ്റാലിയന്‍ അംബാസഡര്‍ രാജ്യം വിടരുത്: സുപ്രീംകോടതി
വ്യാഴം, 14 മാര്‍ച്ച് 2013 (11:33 IST)
PRO
PRO
കടല്‍ക്കൊലക്കേസില്‍ പ്രതികള്‍ രാജ്യം വിട്ട സംഭവത്തില്‍ സുപ്രീംകോടതിയും കേന്ദ്രസര്‍ക്കാരും കര്‍ശന നിലപാടുകളിലേക്ക്. ഇറ്റാലിയന്‍ അംബാസഡര്‍ രാജ്യം വിടരുതെന്ന് സുപ്രീംകോടതി ഉത്തരവിട്ടു. നാവികര്‍ എന്തുകൊണ്ട് ഇന്ത്യയില്‍ തിരിച്ചുവരില്ലെന്ന് മാര്‍ച്ച്18നകം വ്യക്തമാക്കണമെന്ന് കാണിച്ച് കോടതി അംബാസഡര്‍ക്ക് നോട്ടീസ് അയച്ചു. അതുവരെ അംബാസഡര്‍ രാജ്യം വിടരുതെന്നാണ് നിര്‍ദ്ദേശം.
അംബാസഡര്‍ 18ന് സുപ്രീംകോടതിയില്‍ ഹാജരാകണം. രണ്ട് ഇന്ത്യന്‍ മത്സ്യത്തൊഴിലാളികളെ വെടിവച്ചുകൊലപ്പെടുത്തിയ നാവികര്‍ ഇനി തിരിച്ചുവരില്ലെന്ന വിഷയത്തില്‍ അംബാസിഡര്‍ക്ക് കേന്ദ്രസര്‍ക്കാരും നോട്ടീസയച്ചിട്ടുണ്ട്.
ചീഫ്‌ ജസ്റ്റീസ്‌ അല്‍ത്തമാസ്‌ കബീര്‍ അധ്യക്ഷനായ ബെഞ്ചാണ്‌ നാവികര്‍ക്ക്‌ നാട്ടില്‍ പോകാന്‍ അനുമതി നല്‍കിയത്‌. ഇന്ത്യയിലെ ഇറ്റാലിയന്‍ അംബാസഡറുടെ പൂര്‍ണ ഉത്തരവാദിത്വത്തോടെയാണ്‌ ഇവരെ നാട്ടിലേക്ക്‌ അയച്ചത്. ഫെബ്രുവരി 24-25 തീയതികളില്‍ നടന്ന തെരഞ്ഞെടുപ്പില്‍ വോട്ടു ചെയ്യാനാണ് ഇരുവരും അനുമതി തേടിയത്.
നേരത്തെ ക്രിസ്തുമസിന് നാട്ടില്‍ പോയ നാവികര്‍ തിരിച്ചെത്തി വാക്ക് പാലിച്ചിരുന്നു. എന്നാല്‍ രണ്ടാമത് നാട്ടില്‍ എത്തിയ അവര്‍ നിലപാട് മാറ്റുകയായിരുന്നു. നാവികര്‍ തിരിച്ചെത്തില്ലെന്ന് ഇറ്റാലിയന്‍ വിദേശമന്ത്രി ഗ്യൂലിയോ ടെര്‍സിയാണ് അറിയിച്ചത്.
2012 ഫിബ്രവരി 15നാണ് കടല്‍ക്കൊല നടന്നത്. നീണ്ടകര തുറമുഖത്തിനടുത്ത് കടലില്‍ ഇറ്റാലിയന്‍ കപ്പലായ എന്‍ റികലെക്‌സിയിലെ നാവികരുടെ വെടിയേറ്റ് രണ്ട് മീന്‍പിടിത്തക്കാര്‍ മരിക്കുകയായിരുന്നു. കൊല്ലം മൂദാക്കര ഡെറിക് വില്ലയില്‍ വാലന്റൈന്‍ (ജലസ്റ്റിന്‍-50), കളിയിക്കാവിള നിദ്രവിള ഇരയിമ്മന്‍തുറ ഐസക് സേവ്യറിന്റെ മകന്‍ അജീഷ് ബിങ്കി (21) എന്നിവരാണിവര്‍.
