ഫേസ്‌ബുക്കില്‍ ഇപ്പോള്‍ കുത്തിപ്പൊക്കല്‍ കാലമാണ്. അതായത് ഫേസ്‌ബുക്ക് ഉപയോഗിക്കാന്‍ തുടങ്ങിയ കാലത്തും മറ്റും അപ്ലോഡ് ചെയ്ത ഫോട്ടോകള്‍ വീണ്ടും ന്യൂസ് ഫീഡിലേക്ക് വരുന്ന സംഭവം. ഇതിനുമാത്രമായി തുനിഞ്ഞിറങ്ങിയിരിക്കുന്ന പലരുമുണ്ട്‍. നമ്മുടെ പ്രോഫൈലുകളിലെ പഴയ ചിത്രങ്ങള്‍ക്ക് അടിയില്‍ കമന്റോ ലൈക്കോ ഇടും. പലപ്പോഴും സൗന്ദര്യമൊന്നും നോക്കാതെ വളരെ കൗതുകത്തോടെ ഇട്ട വിക്രിയകളുടെ ചിത്രങ്ങളെല്ലാം അതിലൂടെ ഉയര്‍ന്ന് വന്നേക്കാം. ഇത് നമുക്കോരോരുത്തര്‍ക്കും നാണക്കേട് ഉണ്ടാക്കും. എന്നാല്‍ ഇതില്‍ നിന്നും രക്ഷപ്പെടാന്‍ എന്താണ് ചെയ്യേണ്ടതെന്ന് നോക്കാം.
ആദ്യമായി നിങ്ങളുടെ പ്രോഫൈലിലെ ഫോട്ടോ സെക്ഷന്‍ എന്ന ഒപ്ഷനുല്‍ പോകുക. അവിടെയുള്ള ആല്‍ബങ്ങള്‍ എന്ന സെക്ഷന്‍ എടുക്കുക. നിങ്ങള്‍ അപ്ലോഡ് ചെയ്തിരിക്കുന്ന ഓരോ ചിത്രങ്ങളും ഇവിടെ ആല്‍ബങ്ങളായിരിക്കും ക്രമീകരിച്ചിരിക്കുക. ഇതില്‍ മോശം എന്ന് നിങ്ങള്‍ക്ക് തോന്നുന്ന ചിത്രങ്ങള്‍ അടങ്ങിയ ആല്‍ബം പ്രൈവറ്റോ, അല്ലെങ്കില്‍ നിങ്ങളുടെ അടുത്തുള്ളവര്‍ക്കു മാത്രമോ കാണാന്‍ സാധിക്കുന്ന രീതിയില്‍ ക്രമീകരിക്കുക. ഇത്തരത്തില്‍ ചെയ്യുന്നത് ബോധപൂര്‍വ്വം നടത്തുന്ന കുത്തിപ്പൊക്കല്‍ കലാപരിപാടിയില്‍ നിന്നും താല്‍കാലികമായി രക്ഷപ്പെടാനുള്ള മാര്‍ഗമാണ്.