ഹൈദരബാദിനു വേണ്ടി ട്രാവിസ് ഹെഡ്, അഭിഷേക് ശര്‍മ, ഹെയ്ന്‍ റിച്ച് ക്ലാസന്‍ എന്നിവര്‍ അര്‍ധ സെഞ്ചുറി നേടി. ഹെഡാണ് വെടിക്കെട്ടിനു തിരി കൊളുത്തിയത്. വെറും 24 പന്തില്‍ ഒന്‍പത് ഫോറും മൂന്ന് സിക്‌സും സഹിതം 62 റണ്‍സ്. യുവതാരം അഭിഷേക് ശര്‍മ 23 പന്തില്‍ ഏഴ് സിക്‌സും മൂന്ന് ഫോറും സഹിതം 63 റണ്‍സ് നേടി. ക്ലാസന്റെ വെടിക്കെട്ട് ഇന്നിങ്‌സ് സണ്‍റൈസേഴ്‌സിന്റെ സ്‌കോര്‍ 250 കടത്തി. ഏഴ് സിക്‌സും നാല് ഫോറും സഹിതം 34 പന്തില്‍ 80 റണ്‍സുമായി ക്ലാസന്‍ പുറത്താകാതെ നിന്നു. ഏദന്‍ മാര്‍ക്രം 28 പന്തില്‍ പുറത്താകാതെ 42 റണ്‍സ് നേടി.
മറുപടി ബാറ്റിങ്ങില്‍ മുംബൈയും തകര്‍ത്തടിച്ചു. രോഹിത് ശര്‍മ (12 പന്തില്‍ 26), ഇഷാന്‍ കിഷന്‍ (13 പന്തില്‍ 34) എന്നിവര്‍ ചേര്‍ന്ന് മികച്ച തുടക്കമാണ് നല്‍കിയത്. തിലക് വര്‍മ 34 പന്തില്‍ ആറ് സിക്‌സും രണ്ട് ഫോറും സഹിതം 64 റണ്‍സ് നേടി ടോപ് സ്‌കോററായി. നമാന്‍ ദിര്‍ 14 പന്തില്‍ 30 റണ്‍സും ടിം ഡേവിഡ് 22 പന്തില്‍ പുറത്താകാതെ 42 റണ്‍സും നേടി. ഹാര്‍ദിക് പാണ്ഡ്യയുടെ മെല്ലെപ്പോക്ക് (20 പന്തില്‍ 24) മുംബൈയ്ക്ക് തിരിച്ചടിയായി.
