ഐപിഎല്ലില്‍ ഈ സീസണില്‍ മികച്ച പ്രകടനങ്ങള്‍ കൊണ്ട് പല യുവതാരങ്ങളും ഞെട്ടിച്ചിട്ടുണ്ടെങ്കിലും ഈ സീസണ്‍ ഒന്നടങ്കം സ്വന്തമാക്കിയിരിക്കുകയാണ് കൊല്‍ക്കത്തയുടെ യുവതാരം റിങ്കുസിംഗ്. റണ്‍വേട്ടയില്‍ മുന്‍നിരയില്‍ സ്ഥാനമില്ലെങ്കിലും ഐപിഎല്ലിലെ ചില അതിമാനുഷികമായ പ്രകടനങ്ങളാണ് റിങ്കുവിനെ വേറിട്ട് നിര്‍ത്തുന്നത്. പലകുറി ഈ പ്രകടനങ്ങള്‍ കാഴ്ചവെയ്ക്കാന്‍ സാധിച്ചതോടെ ഈ ഐപിഎല്ലിന്റെ കണ്ടെത്തലായാണ് റിങ്കുവിനെ ഇതിഹാസതാരങ്ങള്‍ ഉള്‍പ്പടെയുള്ളവര്‍ വിശേഷിപ്പിക്കുന്നത്.
ഇന്നലെ ലഖ്‌നൗവിനെതിരായ മത്സരം അവസാന പന്ത് വരെ എത്തിക്കുന്നതില്‍ റിങ്കുവിന്റെ പ്രകടനം ഏറെ നിര്‍ണായകമായിരുന്നു. പ്ലേ ഓഫ് ഉറപ്പിച്ച ആവേശത്തില്‍ പോലും ലഖ്‌നൗ നായകന്‍ ക്രുണാല്‍ പാണ്ഡ്യ റിങ്കുവിനെ ചേര്‍ത്ത് പിടിച്ചത് ആ പോരാട്ടവീര്യത്തിന് നല്‍കിയ ബഹുമാനമായിരുന്നു. ഈ സീസണിലെ മികച്ച ഫിനിഷര്‍ എന്നതിന് ഒറ്റ ഉത്തരമേയുള്ളുവെന്ന് മുന്‍ ഇംഗ്ലണ്ട് നായകന്‍ കെവിന്‍ പീറ്റേഴ്‌സണും മത്സരശേഷം അഭിപ്രായപ്പെട്ടു. ഇത്തരമൊരു ബാറ്റിംഗ് താന്‍ കണ്ടിട്ടില്ലെന്നും അവിശ്വസനീയമായിരുന്നു റിങ്കുവിന്റെ പ്രകടനമെന്നും ലഖ്‌നൗവിന് വേണ്ടി തിളങ്ങിയ സ്പിന്നര്‍ രവി ബിഷ്‌ണോയിയും പറയുന്നു.
റിങ്കുവിന്റെ പോരാട്ടവീര്യത്തെ സല്യൂട്ട് ചെയ്യുന്നുവെന്നും ഇത്തരമൊരു പ്രതിഭയെ ലോകം തിരിച്ചറിഞ്ഞിരിക്കുന്നുവെന്നും മുന്‍ ഇന്ത്യന്‍ ഓപ്പണര്‍ വിരേന്ദര്‍ സെവാഗ് പറയുന്നു. ഏത് ടീമിനെയും മുള്‍മുനയില്‍ നിര്‍ത്തുന്ന കളിക്കാരന്‍ എന്നായിരുന്നു ലഖ്‌നൗ ടീം റിങ്കുവിനെ വിശേഷിപ്പിച്ചത്. സീസണിലെ 14 മത്സരങ്ങളില്‍ നിന്നും 59.25 ശരാശരിയില്‍ 474 റണ്‍സാണ് റിങ്കു നേടിയിട്ടുള്ളത്.
