ഇറാനിലും ഗള്‍ഫിലും ശക്തമായ ഭൂചലനം; ഇറാനില്‍ നൂറിലേറെ മരണം
ചൊവ്വ, 16 ഏപ്രില്‍ 2013 (20:42 IST)
PRO
PRO
ഇറാനിലും ഗള്‍ഫ് മേഖലയിലും വീണ്ടും ശക്തമായ ഭൂചലനം. ഭൂചലനത്തില്‍ ഇറാനില്‍ നൂറോളം പേര്‍ മരിച്ചു എന്നാണ് അനൌദ്യോഗിക വിവരം. കനത്ത നാശനഷ്ടങ്ങള്‍ ഉണ്ടായി. ഇറാന്‍-പാകിസ്ഥാന്‍ അതിര്‍ത്തിയില്‍ റിക്ടര്‍ സ്കെയില്‍ 7.8 രേഖപ്പെടുത്തിയ ചലനമാണ് അനുഭവപ്പെട്ടത്. പാകിസ്ഥാനിലെ ബലൂചിസ്ഥാനില്‍ അഞ്ച് പേര്‍ മരിച്ചു.
അതേസമയം ഇറാനില്‍ 40 പേര്‍ മരിച്ചതായി ഇറാന്‍ പ്രസ് ടിവി റിപ്പോര്‍ട്ട് ചെയ്യുന്നു. ഖഷ് പട്ടണത്തില്‍ നിന്ന് 90 കിലോമീറ്റര്‍ തെക്ക്കിഴക്ക് മാറിയാണ് ഭൂചലനത്തിന്റെ പ്രഭവകേന്ദ്രം എന്ന് യു എസ് ജിയോളജിക്കല്‍ സര്‍വേ അറിയിച്ചു. 73 കിലോമീറ്റര്‍ ആഴത്തിലാണ് പ്രഭവകേന്ദ്രം.
ഗള്‍ഫ് മേഖലയിലും ഇതിന്റെ ശക്തമായ തുടര്‍ ചലനങ്ങള്‍ ഉണ്ടായി. അല്‍-ഐന്‍, ദുബായ്, ഷാര്‍ജ, അബുദാബി, ഖത്തര്‍, സൌദി, ഒമാന്‍ തുടങ്ങിയ ഇടങ്ങളിലാണ് ഭൂചലനം ഉണ്ടായത്. ആളുകള്‍ ഭയന്ന് കെട്ടിടങ്ങളില്‍ നിന്ന് പുറത്തേക്ക് ഓടി. എന്നാല്‍ ആളപായമോ നാശനഷ്ടങ്ങളോ റിപ്പോര്‍ട്ട് ചെയ്തിട്ടില്ല. അഫ്ഗാനിസ്ഥാനിലെ കാണ്ഡഹാര്‍ പാകിസ്ഥാനിലെ കറാച്ചി എന്നിവിടങ്ങളിലും ചലനം അനുഭവപ്പെട്ടു.
ഉത്തരേന്ത്യയിലും ഇതേസമയം ഭൂചലനം അനുഭവപ്പെട്ടു. റിക്ടര്‍ സ്കെയിലില്‍ 5.5 രേഖപ്പെടുത്തിയ ചലനമാണ് ഡല്‍ഹി, ഛത്തിസ്ഗഢ് എന്നിവിടങ്ങളില്‍ ഉണ്ടായത്. ചൊവ്വാഴ്ച രാവിലെ അസമിലും മറ്റ് വടക്ക് കിഴക്കന്‍ മേഖലയിലും നേരിയ ചലനം അനുഭവപ്പെട്ടിരുന്നു.
തെക്കന്‍ ഇറാനിലും ഗള്‍ഫ് മേഖലയിലും കഴിഞ്ഞ ആഴ്ച ശക്തമായ ഭൂചലനം ഉണ്ടായിരുന്നു. തെക്കന്‍ ഇറാനിലെ ജനസാന്ദ്രതയുള്ള ബഷര്‍ മേഖലയിലുണ്ടായ ശക്തമായ ഭൂചലനത്തില്‍ 40 ഓളം പേര്‍ മരിച്ചിരുന്നു. വ്യാപക നാശനഷ്ടങ്ങള്‍ ഉണ്ടായി. ഇറാനിലുണ്ടായ ശക്തമായ ഭൂചലനത്തിന്റെ തുടര്‍ചലനങ്ങളാണ് അന്ന് ഗള്‍ഫ് മേഖലയില്‍ ഉണ്ടായത്.
