ഒടുവില്‍ ലിന്ഡ്സേ ലോഹന്‍ ആശ്വാസത്തിന്‍റെ നെടുവീര്‍പ്പ് ഉതിര്‍ത്തു. യൂ ട്യൂബില്‍ പ്രത്യക്ഷപ്പെട്ട വീഡിയോയിലെ പെണ്‍കുട്ടി താനല്ലെന്ന് ബോധ്യമായതോടെയാണ് ലിന്ഡ്സേ ആശ്വാസത്തിന്‍റെ നെടുവീര്‍പ്പുകള്‍ വിട്ടത്. മയക്ക് മരുന്ന് ഉപയോഗം, ലൈംഗിക വെളിപ്പെടുത്തലുകള്‍ തുടങ്ങി ഒട്ടേറെ തവണ ലിന്ഡ്സേ വിവാദങ്ങളില്‍ പെട്ടിട്ടുണ്ട്.
പല തവണ ലൈംഗികാപവാദങ്ങളില്‍ പെട്ടിട്ടുള്ള ലിന്‍ഡ്‌സേയുടേത് എന്ന പേരില്‍ രണ്ടാഴ്ചയ്‌ക്ക് മുമ്പായിരുന്നു ഒരു വീഡിയോ ക്ലിപ്പിംഗ് പ്രമുഖ വീഡിയോ ഷെയറിംഗ് സൈറ്റായ യൂ ട്യൂബില്‍ പ്രത്യക്ഷപ്പെട്ടത്. മുന്‍ കാമുകനായ കാലം ബെസ്റ്റിനൊപ്പം ഒരു തിരിച്ചറിയാത്ത പെണ്‍കുട്ടിയുടെ അശ്ലീല ദൃശ്യങ്ങളായിരുന്നു വീഡിയോയിലേത്.
വീഡിയോയുടെ ദൃശ്യങ്ങള്‍ നെറ്റില്‍ നിന്നും എടുത്ത് ബ്രിട്ടീഷ് ടാബ്ലോയ്‌ഡായ സണ്‍ പ്രസിദ്ധീകരിച്ചതോടെയാണ് സംഗതി വിവാദമായത്. ബെസ്റ്റിനൊപ്പം കാണുന്ന പെണ്‍കുട്ടിക്ക് ലിന്‍ഡ്‌സേയുടെ ലക്ഷണങ്ങള്‍ ഉണ്ടായിരുന്നു. ഇരുവരും 2007 ല്‍ പ്രണയത്തിലായിരുന്നു എന്നതും കണക്കിലെടുത്ത് ലിന്ഡ്സേ തന്നെയാണ് വീഡിയോയിലേത് എന്ന ധാരണയും പരന്നു.
മാഞ്ചസ്റ്റര്‍ യുണൈറ്റഡിന്‍റെയും അയര്‍ലണ്ടിന്‍റെയും ഇതിഹാസ ഫുട്ബോള്‍ താരം ജോര്‍ജ്ജ് ബെസ്റ്റിന്‍റെ പുത്രനാണ് കാലം ബെസ്റ്റ്. ഇക്കാര്യം കാലം ബെസ്റ്റ് പിന്നീട് നിഷേധിച്ചെങ്കിലും ആരും അതത്ര കാര്യമായിട്ട് എടുത്തില്ല. എന്നാല്‍ ടി എം ഇസഡ് ഡോട്ട് കോം സംഗതിയുടെ ബാക്കി ദൃശ്യങ്ങള്‍ കൂടി വെളിച്ചത്ത് കൊണ്ട് വന്നതോടെ ക്ലിപ്പില്‍ കാണുന്നത് ലോഹന്‍ അല്ലെന്ന സത്യം പുറത്തായി.