മഴക്കാലമായാല്‍ എല്ലാവരും നേരിടുന്ന പ്രധാന പ്രതിസന്ധിയാണ് വസ്ത്രങ്ങള്‍ കൃത്യമായി ഉണങ്ങാതെ ധരിക്കേണ്ടി വരുന്നത്. മഴക്കാലത്ത് വെയില്‍ നന്നേ കുറവായതിനാല്‍ വസ്ത്രങ്ങള്‍ ഉണങ്ങാന്‍ ധാരാളം സമയം വേണ്ടിവരും. പൂര്‍ണമായി ഉണങ്ങാത്ത അടിവസ്ത്രങ്ങള്‍ ധരിക്കുമ്പോള്‍ പല ആരോഗ്യപ്രശ്‌നങ്ങളും ഉണ്ടാകാന്‍ സാധ്യതയുണ്ട്. പ്രത്യേകിച്ച് അടിവസ്ത്രങ്ങള്‍ കൃത്യമായി ഉണങ്ങാതെ ധരിക്കേണ്ടി വരുമ്പോള്‍.
നനവുള്ള അടിവസ്ത്രം ധരിക്കുമ്പോള്‍ അതില്‍ ബാക്ടീരിയ ഇന്‍ഫെക്ഷനുള്ള സാധ്യത വളരെ കൂടുതലാണ്. നനവുള്ള പ്രതലത്തില്‍ ബാക്ടീരിയ അതിവേഗം വളരുന്നു. ഇത് ദുര്‍ഗന്ധത്തിനും ചൊറിച്ചിലിനും കാരണമാകും. മൂത്രനാളിയിലെ അണുബാധയിലേക്ക് വരെ ഇത് നയിക്കാന്‍ സാധ്യത കൂടുതലാണ്. പ്രത്യേകിച്ച് സ്ത്രീകളില്‍ ആണ് ഇതിനു സാധ്യത. നനഞ്ഞ അടിവസ്ത്രം ധരിക്കുന്നത് സ്ത്രീകളില്‍ യോനീ അണുബാധയ്ക്ക് കാരണമാകും. അണുബാധ മൂലം യോനിയില്‍ വീക്കം, ചുവപ്പ്, തീവ്രമായ ചൊറിച്ചില്‍, മൂത്രമൊഴിക്കുമ്പോള്‍ വേദന എന്നിവയും അനുഭവപ്പെട്ടേക്കാം.
രാത്രി ഉറങ്ങുമ്പോള്‍ അടിവസ്ത്രം ധരിക്കേണ്ട ആവശ്യമില്ലെന്നാണ് ആരോഗ്യവിദഗ്ധര്‍ പറയുന്നത്. അടിവസ്ത്രം ധരിച്ച് ഉറങ്ങുന്നവരില്‍ ത്രഷ്, വാഗിനൈറ്റിസ്, ബാക്ടീരിയല്‍ വാഗിനോസിസ് എന്നിവയ്ക്കുള്ള സാധ്യത കൂടുതലാണ്. ഉറങ്ങുമ്പോള്‍ ശരീരത്തിന്റെ സ്വകാര്യ ഭാഗങ്ങള്‍ വിയര്‍ക്കാനുള്ള സാധ്യത കൂടുതലാണ്. പ്രത്യേകിച്ച് ചൂട് കാലത്ത്. അത്തരം സമയങ്ങളില്‍ അടിവസ്ത്രം ധരിച്ചാണ് കിടക്കുന്നതെങ്കില്‍ അത് ശരീരത്തില്‍ ഫംഗല്‍ ഇന്‍ഫക്ഷന് കാരണമാകും. ശരീരത്തെ ഏറ്റവും കംഫര്‍ട്ട് ആക്കി വേണം രാത്രിയില്‍ ഉറങ്ങാന്‍ കിടക്കാന്‍.
പുതിയ അടിവസ്ത്രം വാങ്ങിയാല്‍ അത് കഴുകി വേണം ഉപയോഗിക്കാന്‍. കഴുകാതെ ഉപയോഗിക്കുന്ന അടിവസ്ത്രങ്ങളില്‍ അപകട സാധ്യത കൂടുതലാണ്. നിര്‍മാണ കേന്ദ്രങ്ങളില്‍ നിന്ന് പാക്ക് ചെയ്തു വരുന്ന വസ്ത്രങ്ങളില്‍ പൊടിയും അണുക്കളും ഉണ്ടാകും. മാസങ്ങള്‍ കവറില്‍ ഇരുന്ന ശേഷമായിരിക്കും നമ്മുടെ കൈകളിലേക്ക് എത്തുന്നത്. ഇത് അണുബാധയ്ക്ക് കാരണമായേക്കാം. കഴുകി വെയിലത്ത് ഇട്ട് നന്നായി ഉണക്കിയ ശേഷം മാത്രമേ അടിവസ്ത്രങ്ങള്‍ ഉപയോഗിക്കാവൂ.
ഒരു ദിവസത്തിലധികം ഒരു അടിവസ്ത്രം ഉപയോഗിക്കരുത്. ദിവസവും അടിവസ്ത്രം മാറണം. നനഞ്ഞാല്‍ അടിവസ്ത്രം ഉടന്‍ മാറ്റുക. ഇറുകിയ അടിവസ്ത്രങ്ങള്‍ ഉപയോഗിക്കരുത്. ആറ് മാസത്തില്‍ ഒരിക്കല്‍ അടിവസ്ത്രങ്ങള്‍ മാറ്റുന്നത് നല്ലതാണ്. വ്യായാമം, കളി എന്നിവയ്ക്ക് ശേഷം അടിവസ്ത്രം എത്രയും പെട്ടന്ന് മാറ്റുക.
അടിവസ്ത്രം ധരിക്കുമ്പോള്‍ പുരുഷന്‍മാര്‍ നിര്‍ബന്ധമായും ശ്രദ്ധിക്കേണ്ട ചില കാര്യങ്ങളുണ്ട്. പുരുഷന്‍മാര്‍ ഇറുകിയ അടിവസ്ത്രങ്ങള്‍ ധരിക്കരുത്. അത് ആരോഗ്യത്തെ ബാധിക്കും. ഇറുകിയ വസ്ത്രം ധരിക്കുന്നത് പുരുഷന്‍മാരുടെ വൃഷണത്തിന്റെ താപനില വര്‍ധിപ്പിക്കുകയും ഇത് ബീജത്തിന്റെ ഗുണനിലവാരത്തെ പ്രതികൂലമായി ബാധിക്കുകയും ചെയ്യും. ഇത് പ്രത്യുല്പാദനശേഷിയെ സാരമായി ബാധിക്കുന്നതാണ്. അതുകൊണ്ട് ഒരുപാട് ഇറുകിയ അടിവസ്ത്രങ്ങള്‍ ഒഴിവാക്കണം.