ബുര്‍ജ്ജ് ഖലീഫ എന്ന രാജമന്ദിരം പടുത്തുയര്‍ത്തിയ മഹാനഗരം. തീട്ടൂരങ്ങള്‍ കോണ്ട് പ്രജകളെ വിറപ്പിച്ചു നിറുത്തുന്ന ഷെയ്ക്കുമാരുടെ ഭരണം. സിംഹത്തെയും കടുവകളെയും വളര്‍ത്തുന്നത് ഹോബിയാക്കിയ രാജകുമാരന്‍മാര്‍. പറഞ്ഞുതുടങ്ങിയാല്‍ ആയിരത്തൊന്നു രാവുകള്‍ കൊണ്ടും തീരില്ല ദുബായ് നഗരത്തിന്‍റെ അപദാനങ്ങള്‍. എന്നാല്‍, നേരമിരുട്ടിയാല്‍ ദുബായ് നഗരത്തിന്‍റെ സ്വാസ്ഥ്യത്തില്‍ കരിനിഴല്‍ വീഴ്ത്തിക്കൊണ്ട് ചിലരിറങ്ങും.
നഗരത്തെ കണ്ണുചിമ്മാതെ കാക്കുവാന്‍ സര്‍വ്വസന്നാഹങ്ങളുമായി നില്‍ക്കുന്ന മധ്യേഷ്യയുടെ പെരുമപ്പെട്ട സൈന്യം അവര്‍ക്കുമുമ്പില്‍ നിസ്സഹായരായി നിലകൊള്ളും. സൈന്യത്തെപ്പോലും നിസഹായരാക്കുന്ന ഈ കുഞ്ഞുഡ്രാക്കുളകള്‍ മൂട്ടയല്ലാതെ മറ്റാരുമല്ല. മൂട്ടകടി പൊറുക്കാതെ അറബികളും ഫിലിപ്പീനികളും പകിസ്താനികളുമെല്ലാം അടങ്ങുന്ന വന്‍ ജനസഞ്ചയം കട്ടിലില്‍ നിന്ന് മട്ടുപ്പാവുകളിലേക്കും ചൂട് സഹിക്കാതെ തിരിച്ച് കട്ടിലിലേക്കും നടന്ന് നേരം വെളുപ്പിക്കും.
കൊതുക് ശല്യമില്ലാത്ത അറേബ്യന്‍ നഗരങ്ങളില്‍ മൂട്ടയാണ് കൊതുകിന്‍റെ ദൌത്യം കൂടി ഏറ്റെടുത്തിരിക്കുന്നത്. മൂട്ട കയറിയാല്‍ എത്ര വിലപ്പിടിപ്പുള്ള ഫര്‍ണിച്ചറും കൊണ്ട് കളയുകയാണ് പണത്തിന് പഞ്ഞമില്ലാത്ത അറബികളുടെ രീതി. അതിനു പാങ്ങില്ലാത്ത പ്രവാസി ഇന്ത്യക്കാര്‍ അടക്കമുള്ളവര്‍ ചില പെസ്റ്റ് കണ്ട്രോള്‍ ഉപാധികള്‍ സ്വീകരിക്കുകയാണ് പതിവ്. ഇതിനായി തങ്ങള്‍ക്ക് ലഭിക്കുന്ന നല്ല വെള്ളിയാഴ്ചകളില്‍ ഒന്ന് അവര്‍ മാറ്റി വെക്കുന്നു.
മുറിയില്‍ മാസത്തില്‍ ഒരിക്കലെങ്കിലും ‘മൂട്ട ബോംബുകള്‍’ വെക്കാന്‍ അവര്‍ നിര്‍ബന്ധിതരാകുന്നു. പൈറെത്രം എന്ന് പേരായ ഒരു തരം രാസവസ്തു അടങ്ങിയ ഒരു കുഞ്ഞു പുകബോംബാണിത്. മുറി പൂര്‍ണമായും അടച്ചിട്ട് ഇതൊരെണ്ണം ‘പൊട്ടിച്ചാല്‍’ മൂട്ടകള്‍ ചത്തുപൊയ്ക്കോളും. എന്നാല്‍ ഇതിലടങ്ങിയ രാസവസ്തു ശരീരത്തിന് അത്ര നന്നല്ലെന്ന പ്രശ്നം ബാക്കികിടക്കുന്നു.
മൂട്ടയെക്കുറിച്ച് വിക്കീപീഡിയ നിരത്തുന്ന അപദാനങ്ങള്‍ കാണുക. ‘സിമിസിഡേ കുടുംബത്തില്പ്പെട്ട ഒരു ചെറിയ പരാദ ജീവിയാണ് മൂട്ട. മനുഷ്യരുടെയും മറ്റ് ഉഷ്ണരക്ത ജീവികളുടെയും രക്തം കുടിച്ചാണ് ഇവ ജീവിക്കുന്നത്. പ്രത്യേകിച്ച് കട്ടിലുകളുടെയും മെത്തയുടെയും അരികില്‍ ധാരാളമായി കാണപ്പെടുന്നു. മൂട്ടകളെ നശിപ്പിക്കാന്‍ മൂട്ട നശീകരണ മരുന്നുകള്‍ ലഭ്യമാണ്.’
ലോകത്തിന്‍റെ പല ഭാഗത്തും മൂട്ട വലിയ പ്രശ്നമാണ്. പാരീസില്‍ മൂട്ട ശല്യം കാരണം വിനോദ സഞ്ചാരികള്‍ കുറഞ്ഞത് ഈയിടെ വാര്‍ത്തയായിരുന്നു. കേരളത്തില്‍ മൂട്ടകള്‍ക്ക് കുപ്രസിദ്ധമായിരുന്നത് സിനിമാ കൊട്ടകകളാണ്. ‘രതിനിര്‍വേദവും മൂട്ടയും മരംചുറ്റി പ്രേമവും’ എന്നത് ഒരു കാലത്തെ മികച്ച കോമ്പിനേഷന്‍ തന്നെയായിരുന്നു. സമീപകാലത്ത് അത്തരം തിയേറ്ററുകള്‍ അന്യം നിന്നുകൊണ്ടിരിക്കുകയാണ്.
അടുത്ത താളില്‍ വായിക്കുക, “മൂട്ടകളെ എങ്ങിനെ പ്രതിരോധിക്കാം?”
PRO
PRO
നിങ്ങള്‍ ഉറങ്ങിക്കിടക്കുമ്പോള്‍ ആരുമറിയാതെ വന്ന് നക്കിക്കൊല്ലാന്‍ തക്കം പാര്‍ത്തു കിടക്കുന്ന ഒരു പരാദ ജീവിയാകുന്നു മൂട്ട. രക്തദാഹിയായി കട്ടിലിന്‍റെയോ കിടക്കയുടെയോ വിടവുകളില്‍ നിലയുറപ്പിച്ചിരിക്കുന്ന മൂട്ടകള്‍ നിങ്ങളുടെ രാത്രികളെ കാളരാത്രികളാക്കി മാറ്റുന്നു. സുഖനിദ്ര ആഗ്രഹിക്കുന്ന ആരും എളുപ്പത്തില്‍ ചെയ്യാവുന്ന ഈ പ്രതിരോധ മാര്‍ഗ്ഗങ്ങള്‍ അവലംബിക്കേണ്ടതാണ്.
1. നിങ്ങളുടെ വീട്ടില്‍ കൂമ്പാരം കൂടിയിരിക്കുന്ന അഴുക്കുകളിലേക്ക് ഒന്നു കണ്ണോടിക്കുക. അവ മൂട്ടകളുടെ സമ്മേളനസ്ഥാനമാണെന്ന് അറിയുക. ഇനി നിങ്ങളുടെ സ്വന്തം ശരീരത്തിലെ അഴുക്കുകളിലേക്ക് കണ്ണുപായിക്കുക. അവയൊക്കെയും മൂട്ടകള്‍ക്ക് ഇരിപ്പിടമാണെന്നും മനസ്സിലാക്കുക. വളരെ പെട്ടെന്നു തന്നെ വീടിന്‍റെ പരിസരവും നിങ്ങളെത്തന്നെയും വൃത്തിയാക്കുക. മൂട്ടകള്‍ വളരെ പെട്ടെന്നു തന്നെ പെരുകും. അതിനാല്‍ കിടക്ക, പുതപ്പുകള്‍തുടങ്ങിയ സകലമാന ജംഗമങ്ങളും കഴുകി വൃത്തിയാക്കുക.
2. എല്ലാ വസ്തുക്കളും എല്ലായിടവും നന്നായി കഴുകി വൃത്തിയാക്കുക. ചൂടുവെള്ളമുപയോഗിച്ച് തുണികളും തറയുമെല്ലാം കഴുകുക. നല്ല വെയിലത്തിട്ട് ഉണക്കുക. കഴിയുന്നിടമെല്ലാം ആല്‍ക്കഹോള്‍ സൊല്യൂഷന്‍ ഉപയോഗിച്ച് വൃത്തിയാക്കുക. വെള്ളം തട്ടിയാല്‍ കേടു വരുന്ന വസ്ത്രങ്ങളും മട്ടും വെയിലെങ്കിലും തട്ടിക്കുക.
3. കട്ടില്‍ ചുവരില്‍ നിന്ന് വെട്ടു നിര്‍ത്തുക. അതുപോലെ മെത്ത ചുവരുമായി ബന്ധം സ്ഥാപിക്കുന്നില്ലെന്ന് ഉറപ്പ് വരുത്തുക. ചുവരുകളിലെ ദ്വാരങ്ങള്‍ മൂട്ടകള്‍ മുട്ടയിട്ട് പെരുകുന്ന ഇടങ്ങളാണെന്ന് അറിയുക. അത്തരം ദ്വാരങ്ങള്‍ വാ‍ള്‍ പുട്ടിയിട്ടോ മറ്റു മാര്‍ഗ്ഗങ്ങള്‍ ഉപയോഗിച്ചോ അടയ്ക്കേണ്ടതാണ്. മൂട്ടകള്‍ക്ക് നടന്നു മാത്രമേ നിങ്ങളുടെ കട്ടിലിലേക്ക് എത്തിച്ചേരാന്‍ കഴിയൂ. കട്ടിലിന്‍റെ കാലിന്മേല്‍ പെട്രോളിയം ജെല്ലി തേച്ചാല്‍ അത്തരം ശ്രമങ്ങള്‍ തടയുവാന്‍ കഴിയും.
4. മൂട്ടകളുടെ വാസസ്ഥാനമായേക്കാവുന്ന വിടവുകളിലും ദ്വാരങ്ങളിലുമെല്ലാം ഡയാറ്റമസിയസ് എര്‍ത്ത് പൊടി വിതറുക. മൂട്ടകളെ കൊല്ലാന്‍ ഉപയോഗിക്കുന്ന എല്ലാ ബോംബുകളിലും പ്രധാന ഘടകമാണ് ഈ പൊടി. ഇവ ധാരാളം വെള്ളം വലിച്ചെടുക്കുകയും അതു വഴി മൂട്ടകള്‍ക്ക് നിര്‍ജ്ജലീകരണം സംഭവിച്ച് ചത്തു വീഴുകയും ചെയ്യുന്നു.
5. ആല്‍ക്കഹോള്‍ മിശ്രിതം വളരെയധികം ഗുണം ചെയ്യും. വെള്ളമടിക്കാത്തയാളുകള്‍ക്ക് ആല്‍ക്കഹോളിന്‍റെ മണം സഹിക്കാമെങ്കില്‍ മാത്രം കട്ടിലില്‍ പ്രയോഗിക്കുക.