ക്വാര്‍ട്ടറില്‍ ക്രൊയേഷ്യയോട് പെനാല്‍റ്റി ഷൂട്ടൗട്ടില്‍ തോറ്റതിനു പിന്നാലെ പ്രതികരിച്ച് ബ്രസീല്‍ പരിശീലകന്‍ ടിറ്റെ. പെനാല്‍റ്റി ഷൂട്ടൗട്ടില്‍ ബ്രസീലിന്റെ ആദ്യ കിക്ക് എന്തുകൊണ്ട് പരിചയസമ്പത്തുള്ള നെയ്മറിന് നല്‍കിയില്ലെന്ന ചോദ്യത്തിനു ടിറ്റെ മറുപടി നല്‍കി. യുവതാരമായ റോഡ്രിഗോയാണ് ബ്രസീലിന് വേണ്ടി ആദ്യ കിക്ക് എടുത്തത്. ഈ കിക്ക് ക്രൊയേഷ്യന്‍ ഗോളി തടഞ്ഞു.
നെയ്മറിനെ അവസാനത്തേക്ക് മാറ്റി നിര്‍ത്തിയത് തന്ത്രമായിരുന്നെന്ന് ടിറ്റെ പറയുന്നു. അവസാനത്തെയും നിര്‍ണായകവുമായ കിക്ക് എടുക്കേണ്ടത് നെയ്മര്‍ ആണ്. വളരെ സമ്മര്‍ദ്ദമുള്ള സമയത്താണ് കൂടുതല്‍ ക്വാളിറ്റിയോടും മാനസിക കരുത്തോടും പെനാല്‍റ്റി കിക്ക് എടുക്കുന്ന താരത്തെ വേണ്ടത്. അതിനായാണ് നെയ്മറെ അവസാനത്തേക്ക് നിര്‍ത്തിയത്. പക്ഷേ, നിര്‍ഭാഗ്യം കൊണ്ട് അത് നടപ്പിലായില്ലെന്നാണ് ടിറ്റെയുടെ വാക്കുകള്‍.
