ദില്‍ ചാഹ്‌താ ഹൈ വിനീത് ശ്രീനിവസനെ ഏറെ സ്വാധീനിച്ച ഒരു സിനിമയാണ്. വിനീത് സംവിധാനം ചെയ്യുന്ന സിനിമകളിലൊക്കെ ആ സിനിമയുടെ നിറവും ഗുണവും വായിച്ചെടുക്കാനും കഴിയും. ദില്‍ ചാഹ്‌താ ഹെയില്‍ ആമിര്‍ഖാന്‍ ചാരിയിരുന്ന സ്ഥലം പക്ഷേ വിനീത് സംവിധാനം ചെയ്ത ചിത്രങ്ങളില്‍ കാണിച്ചിട്ടില്ല. എന്നാല്‍ ആ ലൊക്കേഷന്‍ വിനീത് നിര്‍മ്മിക്കുന്ന ആദ്യ സിനിമയില്‍ കാണിക്കുന്നുണ്ട്.
അതേ, ‘ഹാബിറ്റ് ഓഫ് ലൈഫി’ന്‍റെ ബാനറില്‍ വിനീത് ശ്രീനിവാസന്‍ നിര്‍മ്മിക്കുന്ന ‘ആനന്ദം’ എന്ന ചിത്രത്തേക്കുറിച്ചാണ് പറഞ്ഞുവരുന്നത്. ആനന്ദത്തിന്‍റെ ട്രെയിലര്‍ പുറത്തിറങ്ങി. നവാഗതനായ ഗണേഷ് രാജ് സംവിധാനം ചെയ്യുന്ന ആനന്ദം, കോളജില്‍ നിന്നുള്ള ഒരു വിനോദയാത്രയുടെ പശ്ചാത്തലത്തിലാണ് കഥ പറയുന്നത്.
ഒരുകൂട്ടം കോളജ് വിദ്യാര്‍ത്ഥികളുടെ ആഘോഷദിവസങ്ങളും അവരുടെ പ്രണയവും യാത്രയുമൊക്കെയായി ഒരു ആഘോഷചിത്രം തന്നെയാണ് ഒരുങ്ങുന്നത്. കൂടുതലും പുതുമുഖങ്ങള്‍ അണിനിരക്കുന്ന ചിത്രത്തില്‍ രണ്‍ജി പണിക്കരെ പോലെ മുതിര്‍ന്ന താരങ്ങള്‍ക്കും ഇടമുണ്ട്.
ഗായകന്‍ സച്ചിന്‍ വാര്യര്‍ ആദ്യമായി സംഗീത സംവിധാനം നിര്‍വഹിക്കുന്ന സിനിമയാണ് ആനന്ദം. ആനന്ദ് സി ചന്ദ്രനാണ് ഛായാഗ്രഹണം.