ടോവിനോയെ നായകനാക്കി 2018ല്‍ നവാഗതനായ ഫെല്ലിനി സംവിധാനം ചെയ്ത സൂപ്പര്‍ ഹിറ്റ് ചിത്രമാണ് തീവണ്ടി. സിനിമയില്‍ ആദ്യം നായകനായി നിര്‍മാതാക്കള്‍ മനസ്സില്‍ കണ്ടത് കുഞ്ചാക്കോ ബോബനെയായിരുന്നു. എന്നാല്‍ അത് ടോവിനോയിലേക്ക് എത്തി. അതിനുള്ള കാരണം വെളിപ്പെടുത്തിയിരിക്കുകയാണ് ചാക്കോച്ചന്‍.
തീവണ്ടിക്ക് ശേഷം ഫെല്ലിനി സംവിധാനം ചെയ്യുന്ന ഒറ്റില്‍ കുഞ്ചാക്കോ ബോബനും അരവിന്ദ് സ്വാമിയും ആണ് പ്രധാന വേഷങ്ങള്‍ ചെയ്യുന്നത്.തീവണ്ടി എന്ന ചിത്രം തന്റെ അടുത്താണ് ഏറ്റവും ആദ്യം വന്നതെന്ന് കുഞ്ചാക്കോ ബോബന്‍ പറയുന്നു. അന്നത് എന്തുകൊണ്ട് ചെയ്തില്ലെന്ന് വിശദീകരിക്കുന്നുണ്ട് താരം.
തനിക്കു സിഗരറ്റ് വലിക്കുന്ന കഥാപാത്രം ആയി അഭിനയിക്കാന്‍ ഉള്ള ബുദ്ധിമുട്ടു കൊണ്ടാണ് അത് ചെയ്യാത്തത് എന്നാണ് ചാക്കോച്ചന്‍ പറയുന്നത്.ആ കഥാപാത്രം ചെയ്തു ഫലിപ്പിക്കാന്‍ തനിക്കു കഴിയില്ലെന്നും തോന്നി.ജീവിതത്തില്‍ സിഗരറ്റ് വലിക്കാത്ത താന്‍, ചെയിന്‍ സ്‌മോക്കര്‍ ആയി അഭിനയിച്ചാല്‍ ആരോഗ്യ പ്രശ്‌നം വരെ ഉണ്ടാവുമെന്നും ഷൂട്ടിംഗ് പോലും വിചാരിച്ച സമയത്തു തീരില്ലെന്നും അവരോട് പറഞ്ഞിരുന്നു. അങ്ങനെയാണ് വേറെ ആളിലേക്കു സിനിമ പോയതെന്ന് കുഞ്ചാക്കോബോബന്‍ അഭിമുഖത്തിനിടെ പറഞ്ഞു.