മോഹൻലാൽ നാലുകാലിൽ ഓടും, തെങ്ങിൻറെ ഉയരത്തിൽ ചാടും !

മലയാളികളുടെ മനസിൽ മോഹൻലാലിൻറെ സ്ഥാനം ആകാശംമുട്ടെ ഉയരത്തിലാണ്. സാധാരണക്കാർക്ക് ചെയ്യാൻ കഴിയാത്തതു പലതും മോഹൻലാലിന് ചെയ്യാൻ കഴിയുമെന്ന് അവർ വിശ്വസിക്കുന്നു. അതുകൊണ്ടാണ് മോഹൻലാൽ പുലിയെ നിസാരമായി വേട്ടയാടുമ്പോൾ നാം അവിശ്വസിക്കാത്തത്. അദ്ദേഹത്തിന് അത് കഴിയുമെന്ന് നാം വിശ്വസിക്കുന്നു.

ഇനി വരുന്ന മോഹൻലാൽ ചിത്രവും അമാനുഷികമായ കഴിവുകളുള്ള മാണിക്യൻ എന്ന കഥാപാത്രത്തെയാണ് കാണിച്ചുതരുന്നത്. വി എ ശ്രീകുമാർ മേനോൻ സംവിധാനം ചെയ്യുന്ന ഒടിയൻ ഓഗസ്റ്റിൽ ചിത്രീകരണം ആരംഭിക്കുകയാണ്. ഒടിയൻ പരമ്പരയിലെ അവസാന കണ്ണിയായ മാണിക്യനെയാണ് മോഹൻലാൽ അവതരിപ്പിക്കുന്നത്.

മാണിക്യൻ ഒരു ഒന്നാന്തരം അത്‌ലറ്റാണ്. അയാൾക്ക് നാലുകാലിൽ ഓടാനും തെങ്ങുയരത്തിൽ ചാടാനുമുള്ള കഴിവുണ്ട്. ഒരു കൺകെട്ട് വിദ്യക്കാരൻറെ കൗശലത്തോടെ ജനങ്ങളെ മായവിദ്യകാട്ടി ഭ്രമിപ്പിക്കാനുമറിയാം. ഒടിയൻ എന്ന സങ്കൽപ്പത്തിൻറെ രസകരമായ ചിത്രീകരണമായിരിക്കും ഈ സിനിമ.

ദേശീയ അവാർഡ് ജേതാവായ ഹരികൃഷ്ണൻ തിരക്കഥയെഴുതുന്ന സിനിമയിൽ പ്രകാശ് രാജ്, മഞ്ജു വാര്യർ എന്നിവരും സുപ്രധാന കഥാപാത്രങ്ങളെ അവതരിപ്പിക്കുന്നു. പാലക്കാടും വാരാണസിയുമായിരിക്കും പ്രധാന ലൊക്കേഷനുകൾ.