ദി ഗ്രേറ്റ്ഫാദര്‍ എന്ന മെഗാഹിറ്റ് ഒരുക്കിയ ഹനീഫ് അദേനി തന്‍റെ അടുത്ത ചിത്രവും മമ്മൂട്ടിയെ നായകനാക്കി ഒരുക്കുമെന്ന് സൂചന. ഇതും ഒരു ആക്ഷന്‍ ഫാമിലി ഡ്രാമയായിരിക്കുമെന്നാണ് സൂചന.
മമ്മൂട്ടിയുടെ കരിയറിലെ ഏറ്റവും വലിയ ഹിറ്റാണ് ഗ്രേറ്റ്ഫാദര്‍. വെറും ആറുകോടി നിര്‍മ്മാണച്ചെലവില്‍ ഒരുക്കിയ സിനിമ 50 കോടി കടന്നപ്പോള്‍ അത് മലയാളം ഇന്‍ഡസ്ട്രിക്ക് തന്നെ വലിയ അഭിമാനമായി. ഒപ്പം ഹനീഫ് അദേനി എന്ന മിടുക്കനായ യുവ സംവിധായകനെയും മലയാളത്തിന് ലഭിച്ചു.
ഒരു പൃഥ്വിരാജ് ചിത്രവും ഒരു മോഹന്‍ലാല്‍ ചിത്രവുമാണ് ഹനീഫ് അദേനി അടുത്തതായി പ്ലാന്‍ ചെയ്തിരിക്കുന്നതെന്നാണ് നേരത്തേ വന്ന റിപ്പോര്‍ട്ടുകള്‍. എന്നാല്‍ പുതിയ വിവരം അനുസരിച്ച് ഒരു മമ്മൂട്ടിച്ചിത്രവും ഹനീഫ് അദേനി ഉടന്‍ പ്ലാന്‍ ചെയ്യുന്നുണ്ട്.
ശ്യാംധര്‍ സംവിധാനം ചെയ്യുന്ന കുടുംബചിത്രവും ഷാംദത്തിന്‍റെ സ്ട്രീറ്റ് ലൈറ്റ്സ് എന്ന ത്രില്ലറും അജയ് വാസുദേവിന്‍റെ കാമ്പസ് ത്രില്ലറുമാണ് ഈ വര്‍ഷം മമ്മൂട്ടിയുടെ പ്രധാന റിലീസുകള്‍.