ഷങ്കറിന്‍റെ 'ഐ' വരുന്നു. നവംബറില്‍ റിലീസ് തീരുമാനിച്ചിരിക്കുന്നു. മറ്റ് സിനിമകളുടെ നിര്‍മ്മാതാക്കളും സംവിധായകരും സൂപ്പര്‍സ്റ്റാറുകളുമൊക്കെ ഈ പ്രഖ്യാപനം ഒരു മുന്നറിയിപ്പായി കാണേണ്ടതിന്‍റെ ആവശ്യകതയുണ്ട്. എന്നാണെന്നോ? 20000 തിയേറ്ററുകളിലാണ് ഐ റിലീസ് ചെയ്യാന്‍ പോകുന്നത്. അതായത്, ഇന്ത്യയിലും വിദേശത്തും പല പ്രമുഖരുടെ സിനിമകള്‍ക്കും ആ സമയത്ത് തിയേറ്ററുകള്‍ കിട്ടാനില്ലാതെ വിഷമിക്കേണ്ടിവരും.
ലോകമെമ്പാടുമായി ഇരുപതിനായിരം തിയേറ്ററുകളില്‍ ഐ റിലീസ് ചെയ്യുമ്പോള്‍ ഇന്ത്യയില്‍ മൂന്ന് ഭാഷകളിലാണ് ചിത്രം പ്രദര്‍ശനത്തിനെത്തുക. തമിഴ്, ഹിന്ദി, തെലുങ്ക് ഭാഷകളില്‍. തമിഴ് ചിത്രത്തിന്‍റെ ഹിന്ദി, തെലുങ്ക് ഡബ്ബിംഗ് വേര്‍ഷനുകളല്ല. മൂന്ന് ഭാഷകളിലായി നിര്‍മ്മിച്ചിരിക്കുന്ന പതിപ്പുകള്‍ തന്നെയാണ് പുറത്തിറങ്ങാന്‍ പോകുന്നത്.
