പ്രമുഖ നടി രേഖ മോഹന്‍റെ മരണം സിനിമാ, സീരിയല്‍ രംഗത്ത് വലിയ നടുക്കമാണ് ഉണ്ടാക്കിയിരിക്കുന്നത്. തൃശൂരിലെ ശോഭാ സിറ്റിയിലെ സ്വന്തം ഫ്ലാറ്റിലാണ് രേഖയുടെ മൃതദേഹം കണ്ടെത്തിയത്. ഡൈനിംഗ് ടേബിളിൽ തല ചായ്ച്ച രീതിയിലാണ് മൃതദേഹം കണ്ടെത്തിയത്. മരിച്ചിട്ട് രണ്ട് ദിവസമായെന്നാണ് പൊലീസിന്റെ പ്രാഥമിക നിഗമനം.
രേഖയെ രണ്ടുദിവസമായി പുറത്ത് കണ്ടിരുന്നില്ലെന്നാണ് അയല്‍‌വാസികള്‍ പൊലീസിനോട് പറഞ്ഞിരിക്കുന്നത്. എന്നാല്‍ ഏതെങ്കിലും ഷൂട്ടിങ്ങ് തിരക്കിലായിരിക്കുമെന്ന് കരുതി അയല്‍‌വാസികള്‍ അന്വേഷിച്ചതുമില്ല. വിദേശത്തുള്ള ഭർത്താവിനെ ഫോണിൽ വിളിച്ചിട്ട് രണ്ട് ദിവസമായി. ഭര്‍ത്താവ് ആവശ്യപ്പെട്ടതനുസരിച്ച് സെക്യൂരിറ്റി ജീവനക്കാരനാണ് ഫ്ലാറ്റ് തുറന്ന് നോക്കിയത്. അപ്പോഴാണ് രേഖ മരിച്ചതായ വിവരം അറിയുന്നത്.
വിരലടയാള വിദഗ്ധരും പൊലീസും ചേർന്ന് ഇൻക്വസ്റ്റ് പൂർത്തിയാക്കി. മൃതദേഹം പോസ്റ്റ്മോർട്ടത്തിനായി തൃശൂർ മെഡിക്കൽ കോളജിലേക്ക് മാറ്റി. ഉദ്യാനപാലകന്‍, നീ വരുവോളം, ഒരു യാത്രാമൊഴി തുടങ്ങി നിരവധി സിനിമകളിലും സീരിയലുകളിലും അഭിനയിച്ചിട്ടുണ്ട്. രേഖ മോഹന്‍റെ ‘മായമ്മ’ എന്ന സീരിയല്‍ കഥാപാത്രം ഏറെ പ്രശസ്തമാണ്.
