നിവിന്‍ പോളിയുടെ ഏറ്റവും സ്‌ട്രോങ് ഏരിയ ഏതാണെന്ന് ഏറ്റവും നന്നായി അറിയുന്നത് നിവിനെ സിനിമയിലേക്ക് കൊണ്ടുവന്ന വിനീത് ശ്രീനിവാസന് തന്നെയാണ്. നിവിന്റെ ഹ്യൂമര്‍സെന്‍സ് അതിശയിപ്പിക്കുന്നതാണെന്ന് വിനീത് പലവട്ടം തുറന്നുപറഞ്ഞിട്ടുമുണ്ട്. അതുകൊണ്ട് തന്നെ 'വര്‍ഷങ്ങള്‍ക്കു ശേഷം' എന്ന ചിത്രത്തിലെ നിവിന്റെ കഥാപാത്രം വിനീത് രൂപപ്പെടുത്തിയത് വളരെ ഈസിയായിട്ടാണെന്ന് വ്യക്തം. 'ഇതാണ് നിന്റെ കഥാപാത്രം, ബാക്കിയൊക്കെ നിന്റെ കൈയില്‍' എന്നുപറഞ്ഞുകൊണ്ട് നിവിനെ വിനീത് അഴിച്ചുവിട്ടിരിക്കുകയാണ്.
ഓവര്‍ ഡ്രാമയിലേക്കോ കേവലം ഒരു ഫീല്‍ ഗുഡ് ചിത്രമെന്ന വൃത്തത്തിനുള്ളിലേക്കോ ചുരുങ്ങുമെന്ന് തോന്നുന്ന സമയത്താണ് നിവിന്‍ ഈ സിനിമയില്‍ രംഗപ്രവേശം ചെയ്യുന്നത്. സമീപകാലത്തെ തന്റെ തുടര്‍ പരാജയങ്ങളെ പോലും നിവിന്‍ ട്രോളുന്നുണ്ട്. കഴിഞ്ഞ കുറേ നാളുകളായി ബോഡി ഷെയ്മിങ് നേരിടുന്ന നടനാണ് നിവിന്‍ പോളി. അത്തരം വിഷയങ്ങളെല്ലാം നിവിന്റെ കഥാപാത്രം ഈ ചിത്രത്തിലൂടെ അഭിസംബോധന ചെയ്യുന്നുണ്ട്. സര്‍ക്കാസിറ്റിക് ആയി അതോടൊപ്പം ഗൗരവത്തില്‍ തന്നെയാണ് തനിക്കെതിരായി ബോഡി ഷെയ്മിങ്ങിനെ കുറിച്ച് നിവിന്‍ ഈ ചിത്രത്തില്‍ പറയുന്നത്.
