‘പുതിയ ആളുകളുടെ കയ്യിൽ പുതിയ കാര്യങ്ങൾ ഉണ്ടാകുമെന്നും അതോടൊപ്പം, പുതിയ ആൾക്കാർക്ക് ഒരു പ്രചോദനമാകുമെന്നും’ മമ്മൂട്ടി തന്നെ ഇതിനെ കുറിച്ച് മുൻപ് പറഞ്ഞിട്ടുള്ളതുമാണ്. മമ്മൂട്ടിയുടെ കരിയറിലെ നിരവധി ഹിറ്റ് ചിത്രങ്ങളുടെ സംവിധായകർ നവാഗതർ തന്നെയാണ്. ഇനി റിലീസ് ചെയ്യാനിരിക്കുന്ന തെലുങ്ക് ചിത്രം ‘യാത്ര’ പോലും സംവിധാനം ചെയ്യുന്നത് പുതുമുഖമാണ്.
ബ്ലെസി, ലാല്‍ ജോസ്, അമല്‍ നീരദ്, അന്‍വര്‍ റഷീദ്, ആഷിക് അബു, വൈശാഖ്, മാര്‍ട്ടിന്‍ പ്രക്കാട്ട്, ഹനീഫ് അദേനി തുടങ്ങി മമ്മൂട്ടി കൊണ്ടുവന്ന സംവിധായകരാണ് ഇന്ന് മലയാള സിനിമയെ താങ്ങി നിര്‍ത്തുന്നത്. പുതുമുഖ സംവിധായകരുടെ ചിത്രങ്ങളില്‍ മമ്മൂട്ടി അഭിനയിക്കുമ്പോഴെല്ലാം വന്‍ ഹിറ്റുകള്‍ ഉണ്ടായിട്ടുണ്ടെന്നതും ചരിത്രം.
