Mammootty and Mohanlal: മലയാളികളില്‍ ആവേശത്തോടെ കാത്തിരിക്കുന്ന മഹേഷ് നാരായണന്‍ സിനിമയ്ക്കു ഉടന്‍ തുടക്കമാകും. ഈ ആഴ്ച അവസാനത്തോടെ ശ്രീലങ്കയില്‍ ചിത്രീകരണം ആരംഭിക്കുമെന്നാണ് വിവരം. മമ്മൂട്ടിയും മോഹന്‍ലാലും ഒന്നിക്കുന്ന ബിഗ് ബജറ്റ് ചിത്രത്തില്‍ ഫഹദ് ഫാസില്‍, കുഞ്ചാക്കോ ബോബന്‍ എന്നിവരും അഭിനയിക്കുന്നുണ്ട്. 11 വര്‍ഷത്തെ നീണ്ട ഇടവേളയ്ക്കു ശേഷമാണ് മലയാളത്തില്‍ മമ്മൂട്ടി-മോഹന്‍ലാല്‍ സംഗമം നടക്കാന്‍ പോകുന്നത്.
മോഹന്‍ലാല്‍ ഇന്ന് കൊളംബോയില്‍ എത്തും. മമ്മൂട്ടി നാളെയാണ് ശ്രീലങ്കയിലേക്ക് തിരിക്കുക. ഒരേ ഹോട്ടലില്‍ ആയിരിക്കും ഇരുവരും താമസിക്കുക. ഷൂട്ടിങ്ങിനായുള്ള തയ്യാറെടുപ്പുകളെല്ലാം പൂര്‍ത്തിയായതായാണ് വിവരം. യുകെ, അസര്‍ബൈജാന്‍, ദുബായ്, ഡല്‍ഹി, ഹൈദരബാദ്, വിശാഖപട്ടണം എന്നിവിടങ്ങളിലും ഈ സിനിമയുടെ ചിത്രീകരണം നടക്കും. മോഹന്‍ലാലിന്റെ ഭാഗങ്ങള്‍ ആദ്യം പൂര്‍ത്തിയാക്കാനാണ് ആലോചന. ബോളിവുഡില്‍ ശ്രദ്ധേയനായ മാനുഷാണ് ഛായാഗ്രഹണം നിര്‍വഹിക്കുക.
ഈ സിനിമയ്ക്കായി മമ്മൂട്ടി 100 ദിവസത്തെ ഡേറ്റ് നല്‍കിയിട്ടുണ്ടെന്നാണ് വിവരം. മമ്മൂട്ടി കേന്ദ്ര കഥാപാത്രത്തെ അവതരിപ്പിക്കുമ്പോള്‍ എക്സ്റ്റന്റഡ് കാമിയോ റോളില്‍ ആകും മോഹന്‍ലാല്‍ എത്തുക. മോഹന്‍ലാല്‍ 30 ദിവസത്തെ ഡേറ്റാണ് നല്‍കിയിരിക്കുന്നതെന്ന് റിപ്പോര്‍ട്ടുകളുണ്ട്. ഡീ ഏജിങ് ഉപയോഗിച്ച് ഇരുവരുടെയും ചെറുപ്പകാലം കാണിക്കുമെന്നും റിപ്പോര്‍ട്ടുകളുണ്ട്. മമ്മൂട്ടി കമ്പനിക്കൊപ്പം ആശീര്‍വാദ് സിനിമാസും ഈ സിനിമയുടെ നിര്‍മാണ പങ്കാളിയാകും.