ഒരിടവേളയ്ക്ക് ശേഷം വീണ്ടുമൊരു മമ്മൂട്ടി ചിത്രം തിയറ്ററുകളിലെത്തുകയാണ്. റോബി വര്‍ഗീസ് രാജ് സംവിധാനം ചെയ്യുന്ന കണ്ണൂര്‍ സ്‌ക്വാഡ് സെപ്റ്റംബര് 28 നാണ് വേള്‍ഡ് വൈഡായി റിലീസ് ചെയ്യുക. മമ്മൂട്ടി കമ്പനി നിര്‍മിക്കുന്ന നാലാമത്തെ ചിത്രമാണ് ഇത്. ജോര്‍ജ് മാര്‍ട്ടിന്‍ എന്ന പൊലീസ് ഉദ്യോഗസ്ഥനായാണ് മമ്മൂട്ടി അഭിനയിക്കുന്നത്.
ഇത്തവണ മമ്മൂട്ടി ചിത്രത്തിനോട് മത്സരിക്കാന്‍ എത്തുന്നത് കുഞ്ചാക്കോ ബോബനാണ്. ടിനു പാപ്പച്ചന്‍ സംവിധാനം ചെയ്യുന്ന ചാവേര്‍ ആണ് അടുത്ത വാരം തിയറ്ററുകളിലെത്തുന്ന കുഞ്ചാക്കോ ബോബന്‍ ചിത്രം. അര്‍ജുന്‍ അശോകന്‍, ആന്റണി വര്‍ഗീസ് എന്നിവരും ചിത്രത്തില്‍ പ്രധാന വേഷത്തിലെത്തുന്നു. അരുണ്‍ നാരായണനും വേണു കുന്നപ്പിള്ളിയുമാണ് നിര്‍മാണം. നടനും സംവിധായകനുമായ ജോയ് മാത്യുവിന്റേതാണ് കഥ. സംഘട്ടന രംഗങ്ങള്‍ക്ക് പ്രാധാന്യം നല്‍കുന്ന ചിത്രം യുവാക്കള്‍ ഏറ്റെടുക്കുമെന്നാണ് അണിയറ പ്രവര്‍ത്തകരുടെ വിലയിരുത്തല്‍. റിലീസിന് മുന്‍പ് തന്നെ ചിത്രത്തിന്റെ ഒ.ടി.ടി റൈറ്റ്‌സ് വിറ്റുപോയിട്ടുണ്ട്. സോണി ലിവ് ആണ് ചാവേര്‍ സ്വന്തമാക്കിയിരിക്കുന്നത്.
