രാഷ്‌ട്രീയത്തിലും സിനിമാ ലോകത്തും ഒരുപോലെ നിറഞ്ഞുനിന്ന വ്യക്തിയായിരുന്നു കരുണാനിധി. അദ്ദേഹത്തിന് ആദരമർപ്പിച്ച് മലയാളം, തമിഴ് സിനിമാ ലോകത്തുള്ളവർ ഒന്നടങ്കം രംഗത്തെത്തിയിട്ടുണ്ട്. അദ്ദേഹത്തിന്റെ വിയോഗത്തിൽ തമിഴ് സിനിമകളുടെ ചിത്രീകരണങ്ങളെല്ലാം നിർത്തിവച്ചിട്ടുണ്ട്. കൂടാതെ ഇന്ന് തമിഴ്‌‌നാട്ടിൽ സിനിമാ പ്രദർശനം ഇല്ലായിരിക്കുമെന്ന് തമിഴ് ഫിലിം പ്രൊഡ്യൂസേഴ്‍സ് കൗണ്‍സില്‍ പ്രസിഡന്റ് വിശാല്‍ കൃഷ്‍ണ അറിയിച്ചു.
ഒരു കലാകാരൻ എന്ന നിലയിൽ താൻ ജീവിതത്തിൽ മറക്കാൻ ആഗ്രഹിക്കുന്ന ദിനമാണിതെന്ന് രജനീകാന്ത് പറഞ്ഞു. അദ്ദേഹവും ഭാര്യയും മകളും ധനുഷും കലൈഞ്ജറിന് ആദരാഞ്ജലി അർപ്പിച്ചിരുന്നു. കുറച്ച് ദിവസങ്ങൾക്ക് മുമ്പ് കരുണാനിധിയെ ആശുപത്രിയിൽ എത്തി സന്ദർശിച്ചിരുന്നെന്നും അദ്ദേഹം ഉറങ്ങുകയായിരുന്നതുകൊണ്ട് നേരിട്ട് സംസാരിക്കാനാൻ കഴിഞ്ഞിരുന്നില്ലെന്നും രജനി മാധ്യമങ്ങളോട് പറഞ്ഞു.
'വിശ്വാസ'ത്തിന്റെ ഷൂട്ടിംഗ് തിരക്കുകളുമായി അജിത്ത് ഹൈദരാബാദിലെ രാമോജി ഫിലിം സിറ്റിയിലായിരുന്നു. മരണവാർത്ത അറിഞ്ഞതോടെ ചിത്രീകരണം നിർത്തിവെച്ച് അദ്ദേഹം ചെന്നൈയിലേയ്ക്ക് വരികയായിരുന്നു. കൂടാതെ നടൻ വിശാലും ട്രിച്ചിയില്‍ ചിത്രീകരണത്തിലായിരുന്നു. അദ്ദേഹവും ഇന്നലെത്തന്നെ ഷൂട്ടിംഗ് നിര്‍ത്തിവച്ച് ചെന്നൈയിലേക്ക് തിരിച്ചു.
