നടൻ ക്രിസ് വേണുഗോപാലിന്റെയും നടി ദിവ്യ ശ്രീധറിന്റെയും വിവാഹത്തിന് പിന്നാലെ ഇവർക്ക് നേരെ വൻ സൈബർ ആക്രമണമായിരുന്നു നടന്നത്. അറുപതു കഴിഞ്ഞ കിളവൻ നാൽപതുകാരിയെ വിവാഹം കഴിച്ചുവെന്നും ഈ പ്രായത്തിൽ കല്യാണം കഴിച്ചത് മറ്റു പലതിനുമാണ് എന്നിങ്ങനെ അറപ്പുതോന്നുന്ന രീതിയിലായിരുന്നു പല കമന്റുകളും. ആദ്യ ബന്ധത്തിൽ താൻ അനുഭവിച്ചതൊന്നും അറിയാതെയാണ് പലരും തങ്ങൾക്കെതിരെ കമന്റുകൾ ഇടുന്നതെന്ന് ദിവ്യ പറയുന്നു.
'ആദ്യത്തേത് പ്രണയവിവാഹമായിരുന്നു. ഒരുപാട് പ്രശ്‌നങ്ങളുണ്ടായിരുന്നു. ആദ്യത്തേത് വീട്ടുകാരുടെ സമ്മതത്തോടെയായിരുന്നില്ല. രണ്ടാമത്തേത് അങ്ങനെയാവരുത് എന്നുണ്ടായിരുന്നു. ഒരുപാട് പ്രശ്‌നങ്ങളിലൂടെ കടന്നുപോയ ആളാണ് ഞാന്‍. നീ എന്ത് ഉണ്ടാക്കി, രണ്ട് മക്കളെയും കൊണ്ട് എങ്ങനെ ജീവിക്കും, വീടുണ്ടോ സ്വത്തുണ്ടോ എന്നൊക്കെയാണ് എല്ലാവരും ചോദിക്കുന്നത്. എന്നാല്‍ ഞാന്‍ ഒറ്റയ്ക്ക് ഒരു കുറവുമില്ലാതെ എന്റെ രണ്ടുമക്കളെയും ഇത്രയും വളര്‍ത്തി വലുതാക്കിയത് ആരും കാണുന്നില്ല. എന്റെ സുഖത്തിനു വേണ്ടി അവരെ തള്ളിപ്പറഞ്ഞിട്ടില്ല.
18-ാം വയസ്സിലായിരുന്നു ആദ്യവിവാഹം. 32-ലാണ് വിവാഹമോചനം. എന്റെ ഒരു നല്ല പ്രായം മുഴുവന്‍ അടിയും ചീത്തയും കേട്ടാണ് നിന്നത്. ആ ജീവിതം ആര്‍ക്കും അറിയണ്ട. സെക്സിനു വേണ്ടിയാണ് വിവാഹം കഴിച്ചത് എന്ന് വരെയായിരുന്നു കമൻ്റുകൾ. എങ്ങനെയാണ് ആളുകള്‍ക്ക് ഇങ്ങനെ ചിന്തിക്കാന്‍ കഴിയുന്നത്. ഞാൻ സെക്സിനു വേണ്ടിയല്ല വിവാഹം കഴിച്ചത്', ദിവ്യ പറയുന്നു.