മലയാളത്തില്‍ സൂപ്പര്‍ഹിറ്റായ സിനിമയാണ് ‘വിക്രമാദിത്യന്’. ലാല്‍ ജോസ് സംവിധാനം ചെയ്ത ചിത്രത്തില്‍ വിക്രമനായി ഉണ്ണി മുകുന്ദനും ആദിത്യനായി ദുല്‍ക്കര്‍ സല്‍മാനുമാണ് അഭിനയിച്ചത്. ഈ സിനിമയുടെ തമിഴ് റീമേക്കിന്‍റെ ചര്‍ച്ചകള്‍ നടക്കുന്നതായി നേരത്തേ വാര്‍ത്തകള്‍ വന്നിരുന്നു.
ഇപ്പോഴിതാ, ചിത്രീകരണം നടക്കുന്ന ഒരു തമിഴ് സിനിമയുടെ വാര്‍ത്തകള്‍ ലഭിക്കുന്നു. ലക്ഷ്മണന്‍ സംവിധാനം ചെയ്യുന്ന ‘ഭോഗന്‍’. അഭിനയിക്കുന്നത് ജയം രവിയും അരവിന്ദ് സ്വാമിയും. തനി ഒരുവന്‍ എന്ന മെഗാഹിറ്റിന് ശേഷം ജയം രവിയും അരവിന്ദ് സ്വാമിയും ഒന്നിക്കുന്നു എന്നതാണ് സിനിമയുടെ പ്രത്യേകത.
എന്നാല്‍ വളരെ ശ്രദ്ധിച്ചുനോക്കിയാല്‍ ഈ പ്രൊജക്ടിന് വിക്രമാദിത്യനുമായി അടുത്ത ബന്ധമുണ്ടോ എന്ന് സംശയിക്കാം. ഈ സിനിമയില്‍ ജയം രവി അവതരിപ്പിക്കുന്ന കഥാപാത്രത്തിന് പേര് വിക്രം. അരവിന്ദ് സ്വാമിയുടെ കഥാപാത്രത്തിന് പേര് ആദിത്യന്‍.
ഇരുവരും തമ്മിലുള്ള ജീവിതമത്സരമാണ് കഥയെന്നാണ് സൂചന. ജയം രവിയുടെ കഥാപാത്രം പൊലീസ് ഉദ്യോഗസ്ഥനായി വരുന്നുണ്ട്. അരവിന്ദ് സ്വാമിയുടെ കഥാപാത്രവും പൊലീസ് യൂണിഫോം അണിഞ്ഞുവരുന്നതായി വര്‍ക്കിംഗ് സ്റ്റില്ലുകളില്‍ നിന്ന് വ്യക്തം.
വിക്രമാദിത്യനില്‍ ഉണ്ണി മുകുന്ദനും ദുല്‍ക്കറും ഒടുവില്‍ പൊലീസ് ഉദ്യോഗസ്ഥരായി മാറുന്നതായാണ് കഥ. അതേ കഥ തന്നെയാണോ ഭോഗന്‍ എന്ന് വ്യക്തമല്ലെങ്കിലും സാദൃശ്യങ്ങള്‍ വ്യക്തമാണ്. വിക്രമാദിത്യനില്‍ ആദ്യപകുതിയില്‍ ഉണ്ണിമുകുന്ദനായിരുന്നു ഹീറോയെങ്കില്‍ രണ്ടാം പകുതിയില്‍ ദുല്‍ക്കറായിരുന്നു ഹീറോ.
ഭോഗനില്‍ ആദ്യപകുതിയില്‍ ജയം രവി ഹീറോയാകുമ്പോള്‍ രണ്ടാം പകുതിയില്‍ ഹീറോ അരവിന്ദ് സ്വാമിയാണ്. ഭോഗന്‍ വിക്രമാദിത്യന്‍റെ ഔദ്യോഗിക റീമേക്കാണെന്ന പരാമര്‍ശം എവിടെയും നല്‍കിയിട്ടില്ല.
പ്രഭുദേവ നിര്‍മ്മിക്കുന്ന ഭോഗന്‍ ഈ വര്‍ഷം ക്രിസ്മസ് റിലീസായി പ്രദര്‍ശനത്തിനെത്തും. ഡി ഇമ്മനാണ് സംഗീതം.