മലയാള സിനിമയിലെ താരരാജാക്കന്മാര്‍ ആണ് മോഹന്‍ലാലും മമ്മൂട്ടിയും. ഇവര്‍ക്ക് പിന്നാലെ വന്ന ഒട്ടുമിക്ക താരങ്ങളും ഇവരുടെ ആരാധകര്‍ തന്നെ. ഇഷ്ട നടന്‍ ആരെന്ന് ചോദിച്ചാല്‍ ഒന്നുങ്കില്‍ മമ്മൂക്ക അല്ലെങ്കില്‍ ലാലേട്ടന്‍. അതായിരിക്കും എല്ലാവരുടെയും ഇഷ്ടം. യൂത്ത് ഐക്കണ്‍ ആസിഫ് അലിക്കും അത്തരം ഒരിത്തിരി ഇഷ്ടക്കൂടുതല്‍ മമ്മൂട്ടിയോടാണ്.
മമ്മൂട്ടിയാണ് തന്റെ റോള്‍ മോഡലെന്ന് പല ചടങ്ങുകള്‍ക്കും പരിപാടികള്‍ക്കും എത്തിയപ്പോള്‍ ആസിഫ് വ്യക്തമാക്കിയിട്ടുണ്ട്. എന്തുകൊണ്ടാണ് മമ്മൂട്ടി തന്റെ റോള്‍ മോഡല്‍ ആകുന്നതെന്ന് കാരണമടക്കം ആസിഫ് പറയുന്നു. കൈരളി ചാനലിന്റെ ജെബി ജംഗ്ഷനില്‍ എത്തിയപ്പോഴാണ് ആസിഫ് ഇക്കാര്യം പറയുന്നത്.
‘സിനിമയില്‍ എത്തിയതിന് ശേഷമാണ് കുടുംബത്തിന്റെ പ്രാധാന്യം മനസ്സിലാക്കിയത്. അതിന് കാരണം മമ്മൂട്ടിയും. കുടുംബത്തോടൊപ്പം ചിലവഴിക്കാന്‍ അദ്ദേഹം സമയം കണ്ടെത്താറുണ്ട്. കുടുംബത്തിന്റെ സാന്നിദ്ധ്യം നഷ്ടപ്പെടാതിരിക്കാന്‍ മമ്മൂട്ടി എപ്പോഴും ശ്രദ്ധിക്കാറുണ്ട്. ഈ ഒരു കാരണം കൊണ്ട് അദ്ദേഹത്തോടുള്ള ഇഷ്ടം കുറച്ച് കൂടി കൂടിയെന്ന് ആസിഫ് പറയുന്നു.
ജെബി ജംഗ്ഷനില്‍ പങ്കെടുക്കണമെന്ന് ആസിഫ് അലിയോട് ആവശ്യപ്പെട്ടതും മമ്മൂട്ടിയായിരുന്നു. അതിനു മുമ്പൊക്കെ വിളിച്ചിട്ടുണ്ടെങ്കില്‍ മുങ്ങി നടക്കുകയായിരുന്നുവെന്ന് ആസിഫ് പറയുന്നു.