മമ്മൂട്ടി തരംഗം ആഞ്ഞടിക്കുകയാണ്. ഈ ഓണക്കാലത്ത് തിയേറ്ററുകളെ ഇളക്കിമറിക്കുന്നത് രാജാധിരാജ. തുടക്കം മുതല്‍ അവസാനം വരെ മമ്മൂട്ടി നിറഞ്ഞുനില്‍ക്കുന്ന സിനിമ മെഗാഹിറ്റായി മാറുകയാണ്. കളക്ഷനില്‍ ഇതുവരെയുള്ള റെക്കോര്‍ഡുകളെല്ലാം രാജ തകര്‍ക്കുമെന്നാണ് ബോക്സോഫീസ് റിപ്പോര്‍ട്ട്.
ജോഷി, വൈശാഖ്, റോഷന്‍ ആന്‍ഡ്രൂസ് തുടങ്ങി മലയാളത്തിലെ സൂപ്പര്‍ ഡയറക്ടര്‍മാരുടെ അസോസിയേറ്റ് ആയിരുന്ന അജയ് വാസുദേവ് ആദ്യമായി സംവിധാനം ചെയ്ത സിനിമ വിജയത്തിന്‍റെ കാര്യത്തിലും രാജമാണിക്യത്തിന്‍റെയും പോക്കിരിരാജയുടെയും പിന്‍‌ഗാമിയാവുകയാണ്. ഓണത്തിരക്കും മഴയുമൊന്നും വകവയ്ക്കാതെ കുടുംബപ്രേക്ഷകര്‍ തിയേറ്ററുകളില്‍ നിറഞ്ഞുകവിയുമ്പോള്‍ സമീപകാലത്ത് ഒരു സിനിമയ്ക്കും ലഭിച്ചിട്ടില്ലാത്ത ഇനിഷ്യല്‍ കളക്ഷനാണ് രാജാധിരാജ നേടുന്നത്.
ഒരിടവേളയ്ക്ക് ശേഷം ഉദയ്കൃഷ്ണ - സിബി കെ തോമസിന്‍റെ തിരക്കഥയില്‍ മലയാളത്തില്‍ ഒരു വമ്പന്‍ ഹിറ്റുകൂടി സംഭവിക്കുകയാണ്. ഒരു ഔട്ട് ആന്‍റ് ഔട്ട് മമ്മൂട്ടി ഷോ എന്ന് വിശേഷിപ്പിക്കാവുന്ന രാജാധിരാജ മെഗാസ്റ്റാറിന്‍റെ വമ്പന്‍ തിരിച്ചുവരവാണ് സാധ്യമാക്കിയിരിക്കുന്നത്.
മംഗ്ലീഷ് മമ്മൂട്ടിയുടെ തിരിച്ചുവരവിന്‍റെ സൂചന നല്‍കിയിരുന്നു. ആ സിനിമ ഹിറ്റായെങ്കിലും അതിനുശേഷം വന്ന മുന്നറിയിപ്പ് എന്ന ചിത്രം മമ്മൂട്ടിയിലെ നടന്‍റെയും താരത്തിന്‍റെയും ഉയിര്‍ത്തെഴുന്നേല്‍പ്പായിരുന്നു. രാജാധിരാജയോടെ മമ്മൂട്ടി വീണ്ടും വിജയത്തിന്‍റെ ട്രാക്കിലെത്തിയിരിക്കുന്നു. ഇനി രാജഭരണം വീണ്ടും ആസ്വദിക്കാം.