വൈറ്റ് എന്ന മമ്മൂട്ടി ചിത്രത്തിലൂടെ മലയാളികള്‍ക്ക് സുപരിചിതയായ ഹുമ ഖുറേഷി പുതിയ ചിത്രത്തില്‍ സെക്‌സ് വര്‍ക്കറായി അഭിനയിക്കുന്നു. രജനികാന്തിന്റെ കാല എന്ന ചിത്രത്തിലാണ് ഹുമ ലൈംഗിക തൊഴിലാളിയായി എത്തുന്നത്. നേരത്തെ ഈ ചിത്രത്തില്‍ ഹുമ രജനികാന്തിന്റെ നായികയായി എത്തുമെന്ന വാര്‍ത്തകളായിരുന്നു പുറത്തുവന്നത്. എന്നാല്‍ പിന്നീട് അണിയറ പ്രവര്‍ത്തകര്‍തന്നെയാണ് ആ വാര്‍ത്ത നിഷേധിച്ചത്.
കാലയില്‍ രജനിയുടെ നായികയായി അഭിനയിക്കുന്നത് ഈശ്വരി റാവു ആണെന്നും വളരെ പ്രാധാന്യമുള്ള മറ്റൊരു കഥാപാത്രത്തെയാണ് ഹുമ അവതരിപ്പിയ്ക്കുന്നതെന്നും സംവിധായകന്‍ പ രഞ്ജിത്താണ് വ്യക്തമാക്കിയത്. സറീന എന്ന കഥാപാത്രത്തെയാണ് ഹുമ അവതരിപ്പിക്കുന്നതെന്നും സംവിധായകന്‍ പറഞ്ഞു.
കബാലിയ്ക്ക് ശേഷം രജനികാന്തിനെ നായകനാക്കി പ രഞ്ജിത്ത് ഒരുക്കുന്ന ചിത്രമാണ് കാല. ചേരിയില്‍ നിന്ന് വരുന്ന അധോലോക നായകനായിട്ടാണ് രജനികാന്ത് ഈ ചിത്രത്തില്‍ വേഷമിടുന്നത്. വണ്ടര്‍ ബാര്‍ ഫിലിംസിന്റെ ബാനറില്‍ മരുമകന്‍ ധനുഷാണ് ചിത്രം നിര്‍മിയ്ക്കുന്നത്. അഞ്ജലി പട്ടീല്‍, പങ്കജ് തിരുപ്പതി, സമുദ്രക്കനി തുടങ്ങിയവരും ഈ ചിത്രത്തില്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നുണ്ട്.