ഉത്സവ സീസണുകള്‍ക്ക് വീണ്ടും തുടക്കമായപ്പോള്‍ ഒരു ആനപ്പക വീണ്ടും മൂന്ന് ജീവിതങ്ങള്‍ അപഹരിച്ചു. അതും ആനപ്രേമികളെ ആവേശത്തേരിലാറാടിക്കുന്ന ഗജരാജന്‍ തെച്ചിക്കോട്ട് കാവ് രാമചന്ദ്രന്റെ കലി.
പെരുമ്പാവൂരില്‍ ഉത്സവത്തിനിടെ ഇടഞ്ഞ ഈ ആനയുടെ ആക്രമണത്തില്‍ മൂന്നു സ്ത്രീകള്‍ കൊല്ലപ്പെട്ടു. കുട്ടികളടക്കം ഇരുപതോളം പേര്‍ക്കു പരുക്ക്‌. പെരുമ്പാവൂര്‍ രായമംഗലം കൂട്ടുമഠം ക്ഷേത്രത്തിലാണു സംഭവമുണ്ടായത്. എഴുന്നള്ളിക്കുന്നതിനു മുന്‍പ് ഡോക്ടര്‍ പരിശോധിച്ച് യോഗ്യതാ സര്‍ട്ടിഫിക്കറ്റ് നല്‍കിയിരുന്നത്രേ. പൂര്‍ണ്ണമായും കുറ്റം ആനയുടെ മസ്തകത്തില്‍ മാത്രം കെട്ടിവെയ്ക്കുന്നതിനു മുന്‍പ് ആനപ്രേമവും ദൈവികസങ്കല്‍പ്പങ്ങളും മാറ്റിവെച്ച് നമുക്ക് ഈ സഹ്യന്റെ മക്കളെ ഒന്നു നോക്കാം.
തെച്ചിക്കോട്ടുകാവ്‌ രാമചന്ദ്രന്‍. ഇന്ത്യയിലെ തന്നെ ഏറ്റവും പൊക്കം കൂടിയ ആനയാണിതെന്ന് പറയപ്പെടുന്നു. മോത്തി പ്രസാദ്‌ എന്നായിരുന്നു അവന്റെ പഴയ പേര്. 18 വയസ്സുള്ളപ്പോള്‍ ബീഹാറില്‍ നിന്നും കൊണ്ട് വന്നതാണ് അവനെ. ചട്ടം പഠിപ്പിക്കുന്നതിനിടയില്‍ നമ്മുടെ പാപ്പാന്മാര്‍ അവന്റെ ഒരു കണ്ണ് അടിച്ചു പൊട്ടിച്ചു. ഇടതു കണ്ണിന്റെ കാഴ്ച നഷ്ടപ്പെട്ടു.
ഇടതുവശത്ത് ഇരുട്ടായതിനാല്‍ ഈ ആനയ്ക്ക് പേടി കൂടുതലാണ്. ഇപ്പോള്‍ വലതുകണ്ണിന്റെ കാഴ്ചയും ഏതാണ്ടു പകുതി നഷ്ടപ്പെട്ടു. പാപ്പാന്റെ സഹായം കൊണ്ട് മാത്രം സഞ്ചരിക്കുന്ന ഒരു കുട്ടിയുടെ ബുദ്ധിപ്പോലുമില്ലാത്ത ദുര്‍ബലജീവിയാണവന്‍. ഇവനാണ് ആള്‍ക്കൂട്ടങ്ങളുടെയും ആരവങ്ങളുടെയും ചെവിതകര്‍ക്കുന്ന കതിനാ, തായമ്പകയുടെ നടുവില്‍ ജനങ്ങള്‍ക്ക് സന്തോഷം പകര്‍ന്നു നില്‍ക്കേണ്ടത്.
കുറച്ച് കാലം മുന്‍പ് പാപ്പാന്‍മാരുടെ മര്‍ദ്ദനത്തെ തുടര്‍ന്ന് കാലിന് ഗുരുതരമായി പരിക്കേറ്റ ഗുരുവായൂര്‍ ആനക്കോട്ടയിലെ കൊമ്പന് അര്‍ജ്ജുന്‍ ചരിഞ്ഞു. അന്ന് ആനകള്‍ക്കെതിരെ നടക്കുന്ന ക്രൂരതകകളെക്കുറിച്ച് മാധ്യമങ്ങള്‍ റിപ്പോര്‍ട്ട് ചെയ്യുമ്പോള്‍ ഗുരുവായൂര്‍ കണ്ണന്റെ ആനക്കൊട്ടിലില്‍ ഒരു മൂക രക്തസാക്ഷി നിന്നിരുന്നു. മുറിവാലന്‍ മുകുന്ദനെന്നറിയപ്പെടുന്ന ഗുരുവായൂര്‍ മുകുന്ദനെന്ന ആന.
നേരെ നില്‍ക്കാന്‍ പോലും കഴിവില്ലാതെ മൂന്നുകാലില്‍ നില്‍ക്കുന്ന അവന്‍ പക്ഷേ ഒരു അത്ഭുതജന്മമാണ്. കീഴടക്കാന്‍ കഴിയാത്ത വ്യക്തിത്വം. മനുഷ്യന്റെ ദുരയ്ക്കു മുന്നില്‍ കീഴടങ്ങാത്ത വന്യത്വം.
ഗുരുവായൂര്‍ കണ്ണന്റെ ആനക്കോട്ടയില്‍ അനുസരണക്കേടിന്റെ ആനരൂപമായി ഒരു മൂലയില്‍ അധികം ആരെയും അടുപ്പിക്കാതെയാണ്‌ അവന്റെ നില്‍പ്പ്‌. ലോഹ്യം കൂടാനും അധികാരത്തിന്റെ തോട്ടിക്കോലുമായി ചെല്ലുന്നവരെയും അവന്‍ പറപറപ്പിക്കും.
കുട്ടിയാനയായി പന്തിയിലെത്തിയ കാലം മുതല്‍ തന്റെ സൂചിക്കൊമ്പില്‍ അവന്‍ പാപ്പാന്മാരെ കുരുക്കി. അടിച്ചൊതുക്കുവാനുള്ള ശ്രമത്തിനിടയില്‍ അവന്റെ ഒരു കാലിനു പരിക്കുപറ്റി. കൂടാതെ ചങ്ങലയുരഞ്ഞുള്ള വ്രണങ്ങളും. പ്രാണന്‍പോകുന്ന വേദനയിലും ആ സഹ്യന്റെ മസ്തകം ഉയര്‍ന്നു തന്നെ നിന്നിരുന്നു. കീഴ്ടങ്ങുകയില്ലെന്ന വാശിയോടെ.
സഹ്യന്റെ മകനെന്ന വൈലോപ്പിള്ളിക്കവിത ഉത്സവത്തെക്കുറിച്ചുള്ള കവിതയല്ല, തന്റെ മൃഗതൃഷ്ണയില്‍ മാതൃഗൃഹമായ വനത്തിലൂടെ സ്വപ്നയാത്ര നടത്തുന്ന ഒരു കൊമ്പന്റെ കഥ. ഇടയ്ക്കൊന്നുണരുമ്പോള്‍ തന്റെ ചുറ്റും കേള്‍ക്കുന്ന വാദ്യഘോഷങ്ങളും ആരവങ്ങളുമൊന്നും തിരിച്ചറിയാനാവുന്നില്ല.
ഇങ്ങനെ മദപ്പാടില്‍ നില്‍ക്കുന്ന ആന ഒന്നു മുന്നോട്ടാഞ്ഞതോടെ കൂച്ചുചങ്ങല പൊട്ടുന്നു. പിന്നെ കോലാഹലം. എപ്പോഴും പത്രങ്ങളും ടിവി ചാനലുകളും ആഘോഷമാക്കുന്ന വാര്‍ത്തകളുടെ ആവര്‍ത്തനവും. ഈ കവിഭാവന സുരക്ഷാ മുന്‍ കരുതലുകളും മറ്റും വര്‍ദ്ധിച്ച ഈ കാലത്തും, മുറതെറ്റാതെ ഉത്സവകാലങ്ങളില്‍ ആവര്‍ത്തിച്ച് അനേകം കുടുംബങ്ങളെ അനാഥമാക്കുന്നു.
ഒരു ഏകപക്ഷീയമായ ആക്രമണമല്ല ആന നടത്തുന്നത്. തന്നെ ചൂഴ്ന്നെടുത്തിട്ടും തന്റെ ബലഹീനതകളെ ചൂഷണം ചെയ്തിട്ടും പ്രകൃതിയെപ്പോലെ ആനയും ക്ഷമിക്കുന്നു. എന്നാല്‍ ഒരു തോട്ടി കൊണ്ട് ആ മഹാമേരു പോലെയുള്ള ജീവിയെ അനുസരിപ്പിക്കുന്ന അഹങ്കാരമാണ് പലപ്പോഴും ഒരു രക്തക്കളത്തില്‍ അവസാനിക്കുന്നത്.
മദമെന്നത് ആനയുടെ പിണങ്ങലും ഒരു അനുസരണക്കേടുമല്ല. പ്രകൃതിയുടെ പ്രതിഭാസം മാത്രമാണ്. പ്രായപൂര്‍ത്തിയായ കൊമ്പന് കൊല്ലത്തില്‍ ഒരിക്കലുള്ള ശാരീരിക പ്രതിഭാസമാണ്‌ മദം. ചില ആനകള്‍ക്ക്‌ രണ്ടുതവണ ഇത് കണ്ടുവരാറുണ്ട്‌. മദകാലത്ത്‌ കന്നഗ്രന്ഥി (തലയുടെ രണ്ടു വശത്തും) തടിച്ചു വീര്‍ത്ത്‌ അതില്‍ നിന്നു മദജലം ഒഴുകുന്നു. ശീത കാലത്താണ്‌ ആന ഇത്തരത്തിലൊരു ഉന്മാദ അവസ്ഥയിലേക്ക്‌ എത്തുന്നത്‌.കണ്ണിനും കാതിനുമിടയിലെ ഈ ഗ്രന്ഥി പൊട്ടി ഒലിക്കുന്നത് ടെസ്റ്റോസ്റ്റെറോണാണ്.
ഈ നേരത്ത് ആനക്കുവേണ്ടത് ശരിയായ ലൈംഗികബന്ധമാണ്. കാട്ടിലാണെങ്കില്‍ ചിലപ്പോള്‍ ഇത് സാധിക്കും. ആനക്കൂട്ടത്തില്‍ ഇണചേരാന്‍ മനസ്സുള്ള പെണ്ണാനകള്‍ ഉണ്ടെങ്കില്‍. അല്ലെങ്കില്‍ കൂടുതല്‍ കരുത്തുള്ള കൊമ്പന്മാര്‍ ഇവനെ തളയ്ക്കുകയോ മുട്ടുകുത്തിക്കയോ ചെയ്യും. ഇതിനു തയാറാവാത്തവന്‍ ഒറ്റയാനായി അലയും.
പക്ഷേ നാട്ടില്‍ ഉത്സവസീസണില്‍ മദം വരാതിരിക്കാന്‍ കടുക്ക അരച്ച് കൊടുക്കും. പിന്നെ പല മരുന്നുകളും പലപീഡനമുറകളും ഇതിന്റെ പ്രതിഫലനങ്ങള്‍ പലപ്പോഴും ഭീകരമായിരിക്കും.
ആനയെന്നത് നിരന്തരം സഞ്ചരിച്ചു കൊണ്ടിരിക്കുന്ന ഒരു മൃഗമാണ്. ശരീരഭാരം സന്തുലനം ചെയ്യാന്‍ കൂട്ടമായി വനയാത്ര. 200 ചതുരശ്ര കിലോമീറ്ററില്‍ നിത്യ വനയാത്ര ചെയ്യുന്ന അതിന്‍െറ ഇപ്പോഴത്തെ വിഹാരം അഞ്ചടി നീളമുള്ള ചങ്ങലദൂരത്തില്‍ മാത്രം. ആനയെ പൊരിവെയിലത്ത് നടത്തുന്നതില്‍ ഉടമസ്ഥര്‍ക്കൊപ്പാം പൊതുജനങ്ങളും കണ്ണീ‍രൊഴുക്കിയപ്പോഴാണ് 30 കിലോമീറ്റര്‍ മാത്രമേ നടത്തിക്കൊണ്ടു പോകാവൂയെന്ന് നിയമമുണ്ടായത്.
ഇത് ഉടമകള്‍ പരമാവധി മുതലെടുത്തെന്ന് കോട്ടയം നഗരമധ്യത്തില്‍ മാത്രം നിന്നാല്‍ ആ‍നകളെയും കൊണ്ട് തലങ്ങും വിലങ്ങും ചീറിപ്പായുന്ന ട്രക്കുകള്‍ കാ‍ണാം. ലോറിയില്‍ കയറ്റിക്കൊണ്ട് പോയ ആന അപകടത്തില്‍പ്പെട്ട് സംഭവങ്ങള്‍ അടുത്തെയുടെ തുടര്‍ക്കഥയാ‍യതും കോട്ടയത്ത് നിന്നാണ്.
25 ഡിഗ്രിക്കുമേല്‍ ഊഷ്മാവു താങ്ങാന്‍ ശേഷിയില്ലാത്ത സ്വേദഗ്രന്ഥിയില്ലാത്ത കറുത്ത ചര്‍മമുള്ള ഈ ജീവിയെ പൊരിവെയിലില്‍ തീവെട്ടികള്‍ക്കും കാതടപ്പിക്കു കരിമരുന്നു പ്രയോഗങ്ങള്‍ക്കുമിടയില്‍ നിര്‍ത്തിയിട്ട് ഒരു പ്രശ്നമുണ്ടാകുമ്പോള്‍ ആനയുടെ പേരിന്റെ കൂടെ ഒരു കൊലപാതകം കൂടി വകവെയ്ച്ച് കൊടുക്കുന്നത് നീതീകരിക്കത്തക്കതല്ല.
കേരളത്തിലെ നാട്ടാനകള്‍ക്കുണ്ടാകുന്ന മുഖ്യ രോഗം എരണ്ടക്കെട്ടാണ്. തെങ്ങോല പ്രധാന ഭക്ഷണമാക്കിയപ്പോള്‍ ഓലയുടെ ഈര്‍ക്കില്‍ വയറ്റിലടിഞ്ഞുകൂടി ഉണ്ടാകുന്ന ഒരു പ്രശ്നം. കാട്ടില്‍ ഒരാനയും ഓല തിന്നാറില്ല. നാനാജാതി ചെറുസസ്യങ്ങളും പുല്ലും മുളയും ലവണാംശമുള്ള മരത്തൊലികളും പഴവര്‍ഗങ്ങളുമാണ് ആനയുടെ സ്വാഭാവികാഹാരം.
ആനകളെക്കുറിച്ച് എ ടു ഇസഡ് വിവരിക്കുന്ന മാതംഗലീല മൂന്നുതരം പാപ്പാന്മാരെപറ്റി പറയുന്നു. സ്നേഹം ആയുധമാക്കുന്ന രേഖവാന്‍, ബുദ്ധിവെച്ചു കളിക്കുന്ന യുക്തിവാന്‍, ശാരീരിക പീഡനംവെച്ചു നയിക്കുന്ന ബലവാന്‍. ഇതില്‍ ഇപ്പോളുള്ള പാപ്പാന്മാര്‍ കൂടുതലും മുന്നാംതരക്കാ‍രാണ് ഇതിന്റെ ഏറ്റവും വലിയ ഉദാഹരണമാണ് കെട്ടിയഴിക്കല്‍ എന്ന കുപ്രസിദ്ധ ചടങ്ങ്.
മുന്‍കാലുകള്‍ രണ്ടും കൂട്ടിക്കെട്ടി, പിന്നിലെ ഒരു കാലിലേക്ക് മറ്റൊരുകെട്ടും കെട്ടിയശേഷം രണ്ടുമൂന്നു പാപ്പാന്മാര്‍ വലിയ കോലുമായി ആനയെത്തല്ലി മര്‍മ്മം തളര്‍ത്തി കൊമ്പ് കുത്തിച്ച് പാപ്പാനെ അനുസരിപ്പിക്കുന്ന ചടങ്ങ്.
ആന ഇടഞ്ഞാലാണ് ഏറ്റവും ക്രൂരമായ പീഡനങ്ങളുണ്ടാവുക. ജനക്കൂട്ടം കയ്യില്‍കിട്ടുന്നതെടുത്തെറിഞ്ഞ് അതിനെ പ്രകോപിപ്പിക്കുന്നതും കൂടുതല്‍ നാശനഷ്ടങ്ങളുണ്ടാവാന്‍ കാരണമാകുന്നതും സ്ഥിരം കാഴ്ചയാണ്. ആരവങ്ങളോടെ ഓടിക്കൂടുന്ന ജനങ്ങള്‍ അതിനെ കൂടുതല്‍ വിരളിപിടിപ്പിക്കും. മയക്കുവെടി വിദഗ്ദനെ വിളിച്ചാലോ. സൈലിസിന്‍ ഹൈഡ്രോ ക്ളോറൈഡാണ് സാധാരണ വെടിക്കുപയോഗിക്കുക.
മയക്കുവെടികൊണ്ട ആനയുടെ ശരീരോഷ്മാവ് കുതിച്ചുയരും. തിരികെ താപം ക്രമീകരിക്കാന്‍ ജലസ്നാനം തന്നെ വേണം ഇതൊന്നും പലപ്പോഴും നടക്കാറില്ല. ഒന്നിനുപകരം മൂന്നുവെടി ഒരു കിട്ടുന്ന ആനയെ പിന്നെ ഒന്നിനും കൊള്ളില്ലെന്ന് വെടിവെയ്ക്കുന്നവര്‍ക്കുള്‍പ്പടെ അറിയാം.
ആനകളാകട്ടെ മുന്‍പെങ്ങുമില്ലാത്തവിധം അക്രമാസക്തരാവുകയുമാണ്. ഇതുവരെയായി നാനൂറില്‍പ്പരം ആളുകളെ ആനകള്‍ കൊന്നിട്ടുണ്ടത്രെ. അതില്‍ 90 ശതമാനത്തിലധികവും പാപ്പാന്മാര്‍. കഴിഞ്ഞ സീസണില്‍ മാത്രം അനകള്‍ കൊന്നത് നാല്പതിലധികം ആളുകളെയാണ്. ആനയുടെ കഷ്ടകാലവും ആരംഭിച്ചു കഴിഞ്ഞു. നാട്ടാനകളുടെ മരണസംഖ്യ ഓരോ വര്‍ഷവും വര്‍ധിച്ചുകൊണ്ടിരിക്കുക യാണെന്നു കണക്കുകള്‍ വ്യക്‌തമാക്കുന്നു. ഇനിയെങ്കിലും സഹ്യന്റെ മകനെ ഒന്നു വെറുതെ വിട്ടുകൂടെ?
