കമിതാക്കള്‍ ഒളിച്ചോടി; യുവാവിന്റെ അമ്മയെ കൂട്ടമാനഭംഗപ്പെടുത്തി യുവതിയുടെ വീട്ടുകാരുടെ പ്രതികാരം

ശനി, 30 ഡിസം‌ബര്‍ 2017 (17:52 IST)
കമിതാക്കള്‍ ഒളിച്ചോടിയതിന് യുവാവിന്റെ അമ്മയെ കൂട്ടമാനഭംഗത്തിനിരയാക്കി യുവതിയുടെ വീട്ടുകാരുടെ പ്രതികാരം. ഉത്തര്‍ പ്രദേശിലാണ് മനസ്സാക്ഷിയെ നടുക്കുന്ന സംഭവം നടന്നത്. കേസിൽ അന്വേഷണം ആരംഭിച്ചതായി പൊലീസ് സുപ്രണ്ട് അജയ് പാൽ ശർമ അറിയിച്ചു.
 
ഗാസിയാബാദിൽ പഠിച്ചിരുന്ന ഇരുപത്തിയാറുകാരനായ യുവാവും മുസഫർനഗർ സ്വദേശിനിയായ ഇരുപത്തിനാലുകാരിയുമാണ് കഴിഞ്ഞ നവംബർ 20ന് ഒളിച്ചോടിയത്. ഇതിനുള്ള പ്രതികാരമായാണ് യുവതിയുടെ ബന്ധുക്കൾ യുവാവിന്റെ മാതാപിതാക്കളേയും സഹോദരൻ, അളിയൻ എന്നിവരെയും തട്ടിക്കൊണ്ടുപോയത്. 
 
ഡിസംബർ 19നായിരുന്നു യുവാവിന്റെ ബന്ധുക്കളെ തട്ടിക്കൊണ്ടുപോയത്. തുടര്‍ന്ന് ഇവരെ ഭീഷണിപ്പെടുത്തുകയും യുവാവിന്റെ മാതാവിനെ കൂട്ടമാനഭംഗത്തിനിരയാക്കുകയുമായിരുന്നു. ഈമാസം 25ന് പൊലീസ് നടത്തിയ പരിശോധനയിലാണ് ഇവരെ കണ്ടെത്താന്‍ കഴിഞ്ഞത്.
 
പ്രതികൾക്കെതിരെ തട്ടിക്കൊണ്ടുപോകല്‍, കൂട്ടമാനഭംഗം എന്നിവയ്ക്കാണ് കേസ് റജിസ്റ്റർ ചെയ്തത്. യുവതിയുടെ പിതാവ്, സഹോദരങ്ങൾ, സഹോദര പുത്രൻ എന്നിവർക്കെതിരെയാണ് പൊലീസ് കേസെടുത്തിരിക്കുന്നത്. മുൻ ഗ്രാമപ്രഥാൻ ആയിരുന്ന യുവതിയുടെ ഒരു സഹോദരനെ പൊലീസ് അറസ്റ്റു ചെയ്യുകയും ചെയ്തു. 
 

വെബ്ദുനിയ വായിക്കുക

അനുബന്ധ വാര്‍ത്തകള്‍