ന്യൂസിലന്‍ഡിനെതിരായ ടി 20 സ്‌ക്വാഡില്‍ ഇടംപിടിച്ചതിന്റെ സന്തോഷത്തിലാണ് ഓള്‍റൗണ്ടര്‍ താരം വെങ്കടേഷ് അയ്യര്‍. കേരളത്തിലെ ഒരു ഹോട്ടല്‍ മുറിയില്‍ ഇരിക്കുമ്പോഴാണ് ഈ സന്തോഷവാര്‍ത്ത വെങ്കടേഷ് അയ്യരെ തേടിയെത്തിയത്. ന്യൂസിലന്‍ഡിനെതിരായ ടി 20 പരമ്പരയ്ക്കുള്ള 16 അംഗ സ്‌ക്വാഡില്‍ ഇടം പിടിച്ച ആവേശ് ഖാനും ആ ഹോട്ടലില്‍ ഉണ്ടായിരുന്നു. ആവേശ് ഖാന്‍ ആണ് വെങ്കടേഷിന്റെ മുറിയില്‍ എത്തി ഇന്ത്യന്‍ സ്‌ക്വാഡില്‍ വെങ്കടേഷിന്റെ പേരും ഉള്ള കാര്യം അറിയിക്കുന്നത്. ആദ്യം വെങ്കടേഷിന് ഇത് വിശ്വസിക്കാനായില്ല. കുറച്ച് കഴിഞ്ഞപ്പോള്‍ സന്തോഷം കൊണ്ട് മതിമറന്ന് താന്‍ ആവേശ് ഖാനെ കെട്ടിപ്പിടിക്കുകയായിരുന്നെന്നും വെങ്കടേഷ് അയ്യര്‍ പറഞ്ഞു.
ഇന്ത്യന്‍ ജേഴ്‌സിയില്‍ കളിക്കാന്‍ അവസരം ലഭിക്കുന്നതില്‍ അഭിമാനവും സന്തോഷവും ഉണ്ടെന്ന് വെങ്കടേഷ് അയ്യര്‍ പറഞ്ഞു. 'ഞാന്‍ വളരെ സന്തുഷ്ടനാണ്. ഞാന്‍ നന്നായി പരിശ്രമിച്ചു. സത്യസന്ധമായി പറഞ്ഞാല്‍ ഞാനിത് പ്രതീക്ഷിച്ചിരുന്നില്ല. കളിക്കാനിറങ്ങുമ്പോള്‍ ഞാന്‍ എപ്പോഴും ആഗ്രഹിക്കുന്നത് ടീമിനായി സാധിക്കുന്ന അത്രയും റണ്‍സ് അടിച്ചെടുക്കുക എന്നത് മാത്രമാണ്. സെലക്ടര്‍മാരോടും ഇന്ത്യന്‍ ക്യാപ്റ്റനോടും ടീമിലെ മുതിര്‍ന്ന താരങ്ങളോടും പരിശീലകരോടും ഞാന്‍ നന്ദി പറയുന്നു. ഒരു ദിവസം ഇന്ത്യന്‍ ജേഴ്സി അണിയുകയെന്നതാണ് എല്ലാ താരങ്ങളുടെയും സ്വപ്നം. ഇപ്പോള്‍ ആ ദിവസം വന്നെത്തിയിരിക്കുന്നു. എന്റെ സന്തോഷം പറഞ്ഞറിയിക്കാന്‍ വാക്കുകളില്ല,' വെങ്കടേഷ് അയ്യര്‍ പറഞ്ഞു.
