ഇന്ത്യന്‍ ഫുട്‌ബോളിന്‌ ഐഎസ്‌എല്ലിലെ സ്വന്തം ടീം കൊച്ചിന്‍ ബ്ലാസ്‌റ്റേഴ്‌സുമായി ബന്ധപ്പെട്ട്‌ ഇതിഹാസ ക്രിക്കറ്റ്‌താരം സച്ചിന്‍ ടെന്‍ഡുല്‍ക്കര്‍ കൊച്ചിയില്‍. നെടുമ്പാശേരി വിമാനത്താവളത്തില്‍ രാവിലെ 8.10ന് ജെറ്റ്‌ എയര്‍വേയ്‌സിലാണ് സച്ചിന്‍ എത്തിയത്‌. പിന്നീട്‌ ടീം താമസിക്കുന്ന ക്രൗണ്‍ പ്ലാസ ഹോട്ടലില്‍ എത്തിയ സച്ചിന്‍ അവിടെ ടീം അംഗങ്ങളെ പരിചയപ്പെട്ടു.
കഴിഞ്ഞ ദിവസം മഞ്ഞ ജഴ്‌സിയണിഞ്ഞ്‌ ആരാധകരുടെ പിന്തുണ തേടി സച്ചിന്‍ ചെയ്‌ത ഫേസ്‌ബുക്ക്‌ പോസ്‌റ്റിന്‌ വലിയ സ്വീകരണം ലഭിച്ചിരുന്നു. കേരള ടീമിന്റെ ആദ്യ ഹോം മാച്ച്‌ നവംബര്‍ ആറിനോ ഏഴിനോ നടക്കുമെന്നാണ്‌ വിവരം. ഒക്‌ടോബര്‍ 15 നായിരുന്നു നിശ്‌ചയിച്ചിരുന്നതെങ്കിലും വിവിധ പരിപാടികളെ തുടര്‍ന്ന്‌ ഗ്രൗണ്ട്‌ ലഭിക്കാത്ത സാഹചര്യത്തില്‍ കളി അനിശ്‌ചിതമായി നീളുകയാണ്‌.
